Qazaqstannyń 50-den astam bolashaq áskerı dárigeri tórt elde bilim alyp jatyr
ASTANA. KAZINFORM — Qazaqstannyń 50-den astam bolashaq áskerı dárigeri Túrkııa, Armenııa, Qytaı jáne Reseıdiń medıtsınalyq joǵary oqý oryndarynda bilim alyp jatyr. Olar oqýyn aıaqtaǵan soń elimizdiń Qarýly kúshteriniń áskerı-medıtsınalyq bólimshelerinde qyzmet etýge daıyndalady. Bul týraly Qorǵanys mınıstrligi málim etti.
Vedomstvonyń málimetinshe, elimizdegi jáne sheteldik medıtsınalyq joǵary oqý oryndarynda 200-den astam bolashaq áskerı dáriger bilim alyp jatyr. 2027 jyly Qarýly kúshterdiń áskerı-medıtsınalyq bólimshelerine bakalavrıat, ınternatýra jáne rezıdentýra bitirgen 40-qa jýyq túlek qosylmaq.
— Bolashaq mamandardyń basym bóligi Áýe qorǵanysy kúshteriniń áskerı ınstıtýtynda bilim alady. Munda 150-den astam bolashaq dáriger áskerı daıarlyqtan ótýde. Onyń ishinde 80-nen astam qyz bar. Olar medıtsınalyq pánderdi Marat Ospanov atyndaǵy Batys Qazaqstan medıtsına ýnıversıtetinde meńgeredi. Barlyq kýrsanttar memleket tarapynan tolyq qamtamasyz etilgen, — delingen habarlamada.
Budan bólek, 50-den astam bolashaq áskerı dárigerler Túrkııa, Armenııa, Qytaı jáne Reseıdiń medıtsınalyq joǵary oqý oryndarynda bilim alyp jatyr.
Daıarlyqtyń jeke baǵyty — maqsatty bilim berý granttary arqyly beıindi mamandardy oqytý. Qorǵanys mınıstrliginiń suranysy boıynsha S. D. Asfendııarov atyndaǵy Qazaq ulttyq medıtsına ýnıversıteti men Astana medıtsına ýnıversıtetiniń rezıdentýrasynda bilim alýǵa arnalǵan osyndaı granttar bólinip otyr.
Onda bolashaq áskerı dárigerler hırýrgııa, anestezıologııa jáne reanımatologııa, terapııa, rentgenologııa, sondaı-aq klınıkalyq zerthanalyq dıagnostıka baǵyttary boıynsha mamandanady.
— Áskerı-medıtsınalyq mekemelerdiń qajettiligin qamtamasyz etý úshin jas mamandardy tartý baǵdarlamasy osymen ekinshi jyl qatarynan júzege asyrylyp keledi. Qazirgi ýaqytta 16 adam bilim alyp jatyr. Olar oqýyn aıaqtaǵannan keıin bizdiń bólimshelerde qyzmetin jalǵastyrady, — dedi QR Qarýly kúshteri Bas áskerı-medıtsınalyq basqarmasy bastyǵynyń emdeý-profılaktıkalyq jumys jónindegi orynbasary medıtsına qyzmetiniń polkovnıgi Berik Іlııasov.
Rezıdentýrada dárigerlerdi daıarlaý Qorǵanys jáne Densaýlyq saqtaý mınıstrlikteriniń yntymaqtastyǵy aıasynda qarjylandyrylady. Maqsatty granttar áskerı-medıtsınalyq bólimder men mekemelerdiń suranysyna ıe mamandyqtar boıynsha kadr daıarlaýǵa múmkindik beredi.
Qarýly kúshterdiń túrli mamandyqtaǵy dárigerlerge degen qajettiligi eskerile otyryp, Qazaqstannyń jáne shetelderdiń medıtsınalyq joǵary oqý oryndarymen yntymaqtastyq aldaǵy ýaqytta da jalǵasyn taba bermek.
