Qazaqstannyń 5 myń shaqyrymǵa jýyq temirjoly jańǵyrtylady

ASTANA. KAZINFORM – Bıyl elimizdiń 5 myń shaqyrym temirjolynda qurylys jáne jóndeý jumystary ótedi. Bul týraly Kólik mınıstri Marat Qarabaev aıtyp berdi.

Mınıstrdiń aıtýynsha, 2400 shaqyrym úshin qarjy kózderi anyqtaldy, qalǵan 2600 shaqyrym Prezıdenttiń Transqazaqstandyq temirjol dálizin damytý jónindegi tapsyrmasyn iske asyrý sheńberinde josparlanǵan.

− Osyǵan baılanysty, birqatar jańa joba júzege asyrylady: «Qyzyljar — Moıynty» jańa temirjol jelisi salynady, ekijolaqty «vstavka» men qabyldaý-jóneltý joldaryn salý arqyly «Altynkól — Jetigen» jáne «Beıneý — Mańǵystaý» ýchaskeleri jańǵyrtylady, − dedi Marat Qarabaev búgingi Úkimet otyrysynda.

Sonymen birge, «Qyzyljar — Sekseýil», «Shalqar — Beıneý», «Qandyaǵash — Tobyl», «Álimbet — Nıkeltaý» jáne «Aqsý — Degeleń — Jańa-Semeı» ýchaskelerinde zamanaýı retteý júıeleri engiziledi.

Elimizdiń 53 temirjol vokzaldary rekonstrýktsııalanady.

Buǵan deıin Kólik mınıstri Qazaqstandaǵy joldar qurylysynda otandyq kompanııalarǵa artyqshylyq beriletinin aıtqan edi.

Sondaı-aq, bıyl «Jezqazǵan-Qaraǵandy», «Aqtóbe-Ulǵaısyn», «Atyraý-Dossor» jańa joldarynyń qurylysy bastalady.