Qazaqstannyń 400-ge jýyq dıplomaty sırek tilderdi meńgergen

ASTANA. KAZINFORM — Elimizdiń 400-ge jýyq dıplomaty sırek tilderdi meńgergen. Bul týraly Senattyń jalpy otyrysynda QR Syrtqy ister mınıstriniń orynbasary Álibek Baqaev málim etti.

- Qazirgi kezde Syrtqy ister mınıstrliginiń ortalyq apparatynda 139 adam sırek tilderdi meńgergen, al sheteldegi ókildikterimizde sırek tilderdi biletin dıplomattardyń sany 234-ke jetti. Atap aıtqanda, sırek tilder tizimi Syrtqy ister mınıstriniń buıryǵymen bekitiledi. Osy tizimge 23 til qosyldy, - dedi Á. Baqaev depýtattardyń suraǵyna jaýap bere otyryp.

Budan buryn habarlanǵandaı, búgin Senattyń jalpy otyrysynda «Qazaqstan Respýblıkasynyń keıbir zańnamalyq aktilerine dıplomatııalyq qyzmet, halyqaralyq sharttar jáne damýǵa resmı kómek máseleleri boıynsha ózgerister men tolyqtyrýlar engizý týraly» Zańy maquldandy.

Qujat aıasynda dıplomatııalyq qyzmetshilerdiń shet tilderin bilgeni úshin tólemderdi ózgertý eskerilgen. Qoldanystaǵy zańnamaǵa sáıkes, dıplomatııalyq qyzmetke kirý kezinde shet tilderdi bilý mindetti, sondyqtan tólemder sırek tilderdi bilgeni úshin ǵana júzege asyrylady. Bul ózgeris te respýblıkalyq bıýdjet qarajatyn únemdeýge baǵyttalǵan.

Syrtqy ister mınıstrliginen 11 fýnktsııa alynyp tastaldy.