Byltyr AQSh-tan qansha Qazaqstan azamaty shyǵaryldy
ASTANA. KAZINFORM — AQSh-tyń kóshi-qon jáne keden polıtsııasynyń baıandamasyna sáıkes ótken jyly Qazaqstannyń 24 azamaty AQSh-tan shyǵaryldy. Al 2023 jyly AQSh 13 qazaqstandyqty elden deportatsııalady, dep habarlaıdy Kazinform agenttiginiń menshikti tilshisi.
Sondaı-aq Static Foxnews aqparat agenttiginiń málimetine súıensek, «AQSh ımmıgratsııa jáne keden organdarynyń ustalǵandar tizimindegi azamattyǵy joq tulǵalar, elderine túpkilikti shyǵarý týraly buıryqtary bar» dep atalatyn qujatqa sáıkes, 2024 jylǵy 24 qarashadaǵy jaǵdaı boıynsha 1 445 549 adam tirkelgen. Olardy AQSh aýmaǵynan shyǵarý týraly túpkilikti qaýly shyqqan.
Tizimde Gondýras (261,651), Gvatemala (253,413), Meksıka (252,044) jáne Salvador (203,822) azamaty basym, 369 azamat Qazaqstannan dep kórsetilgen.
Deportatsııa týraly bul aqparat AQSh prezıdenti Donald Tramptyń kóshi-qon saıasatynyń kúsheıýimen baılanysty degen oı týǵyzdy. Osy oraıda, búgin Qazaqstan Syrtqy ister mınıstrliginiń resmı ókili Aıbek Smadııarov túsinik berdi.
— Kesheden beri BAQ pen áleýmettik jelilerde AQSh jańa prezıdentiniń saıasatyna baılanysty sol elde zańsyz júrgen myńdaǵan mıgrant deportatsııalanady degen aqparat keńinen tarap jatyr. Barlyǵy Fox News-tiń habarlamasyna júginip, jańalyq jasap jatyr. Oǵan qosa deportatsııaǵa jatatyn mıgranttardyń arasynda 369 qazaqstandyq ta bar eken-mys. Al sol aqparatty tekserip qarasaq, Fox News bul jańalyqty 2024 jylǵy 11 jeltoqsanda jarııalaǵan, — dedi.
Demek, bul aqparattyń AQSh-tyń kóshi-qonǵa qatysty jańa saıasatyna esh qatysy joq.
— Jalpy alǵanda, deportatsııa degen bir memleketten jaǵymsyz tulǵany májbúrlep shyǵarý. Mundaı deportatsııalaý árbir memlekette kúnde júzege asyrylyp jatqan qalypty is-shara. Sondyqtan ol týraly zańsyz kelgen basqa eldiń azamattaryn shekaradan ótkizbeı nemese zańsyz júrgen tulǵalardy deportatsııalasa, sol eldiń bıligi elshilik nemese konsýldyqqa habarlaýǵa mindetti emes, — deıdi Aıbek Smadııarov.
Kazinform agenttigi deportatsııalaýǵa jatatyn 369 Qazaqstan azamatynyń taǵdyryna qatysty QR Syrtqy ister mınıstrligine resmı saýal joldady.
Eske sala ketsek, Donald Tramp bılikke kele sala AQSh-ta jumys isteýge ruqsat beretin mıgratsııalyq qosymshanyń jumysyn toqtatty.
Osyǵan deıin AQSh-taǵy mıgratsııalyq saıasattyń qatańdatylýyna baılanysty Qazaqstan elshiligi shetelde qujatsyz, vızasyz júrgen qazaqstandyqtarǵa eskertý jasady.
Keshe elimizdiń Syrtqy ister mınıstrligi AQSh-taǵy mıgratsııalyq saıasattyń qatańdatylýyna baılanysty Qazaqstan azamattarynyń taǵdyryna qatysty túsinik berdi.