Qazaqstannyń 3 ýnıversıtetinde JI mamandaryn oqytý bastaldy

ASTANA. KAZINFORM –  Elimizde 3 joǵary oqý orny jasandy ıntellekt salasynda kadr daıyndaýdy bastady. Bul týraly Joǵary jáne joǵary oqý ornynan keıingi bilim komıteti tóraǵasynyń orynbasary Gúljan Jarasova aıtyp berdi. 

− Dúnıejúzilik ekonomıkalyq forým 2028 jylǵa deıin kásiporyndardyń 87% jumysy jasandy ıntellektpen tolyqtyrylady nemese aýystyrylady dep boljap otyr. Sondyqtan qazir ınjenerlerdi daıarlaýdyń barlyq baǵdarlamasyna kásibı qyzmette jasandy ıntellektti qoldanýdy oqytatyn pánder engizilip jatyr, − dedi Gúljan Jarasova Ortalyq kommýnıkatsııalar qyzmetinde ótken brıfıngte.

Prezıdent tapsyrmasyn oryndaý úshin sheteldik jetekshi ýnıversıtettermen birlesip, 3 ýnıversıtet bazasynda JI salasynda kadr daıarlaý jumystary bastaldy.

− Qorqyt ata atyndaǵy Qyzylorda ýnıversıteti Seýl ulttyq ǵylym jáne tehnologııalar ýnıversıtetimen (SeoulTech) birlesip, Sátbaev ýnıversıteti City University of Hong Kong (CityU) birlesip, al D.Serikbaev atyndaǵy ShQTÝ Lý Ban sheberhanasy bazasynda jasandy ıntellekt mamandaryn daıarlaýdyń jańa baǵdarlamalaryn qolǵa aldy, − deıdi spıker.

Osyǵan uqsas jumystar Astana IT University, HATÝ sekildi basqa da oqý oryndarynda júrgizilýde.

− Munda praktıkaǵa baǵdarlaný qaǵıdatyn kúsheıtýge basa mán beriledi. Mysaly, Qyzylorda ýnıversıteti bazasyndaǵy SeoulTech JI ınstıtýtynda kreatıvti ıdeıalar qurý jáne birlesip jumys isteý úshin Wowideas platformasy paıdalanylady. Oqýǵa qabyldanǵan stýdentter bıznes-ınkýbatordyń rezıdenti retinde tirkeledi jáne jergilikti bıznestiń suranysyna sáıkes tsıfrlyq sheshimder daıyndaýmen aınalysady, − dep túsindirdi G. Jarasova.

Sondaı-aq, 2023 jyldan bastap elimizde JOO stýdentterine Coursera platformasynyń resýrstaryna tegin qoljetimdilik berildi. Eki jylda 134 myńǵa jýyq stýdent 227 myńnan astam sertıfıkat aldy, onyń ishinde 4,5 myń stýdent JI, Mashınalyq oqytý, Kompıýterlik kórý, Generatıvti JI baǵyttarynda 225 kýrsty oqyp, 5 myńnan astam sertıfıkat alǵan.

Buǵan deıin G. Jarasova Qazaqstan JOO-laryna ınjenerlik bilim berýdiń jańa modeli engiziletinin aıtqan edi. Búginde Qazaqstannyń 54 JOO-synda ınjenerler oqytylady, onda 103 myńnan astam stýdent oqıdy.

Sondaı-aq, Qazaqstandy Ortalyq Azııanyń bilim berý habyna aınaldyrý maqsatynda elimizde 16 sheteldik ýnıversıtettiń fılıaldary ashylǵan.