Qazaqstannyń 23 myńnan astam sý nysany tsıfrlyq baqylaýǵa alyndy
ASTANA. KAZINFORM — Astanada sý resýrstarynyń jaı-kúıin jedel baqylaýǵa arnalǵan Sıtýatsııalyq ortalyq ashyldy. Jańa ortalyq arqyly 23 myńnan astam sý nysany týraly derek taldanyp, sý qoryn basqarý tıimdiligi artady. Bul týraly Sý resýrstary jáne ırrıgatsııa mınıstrligi málim etti.
Mınıstrliktiń málimetinshe, ortalyq Germanııa halyqaralyq yntymaqtastyq qoǵamynyń (GIZ) qoldaýymen «Sý resýrstarynyń aqparattyq-taldaý ortalyǵy» KEAQ bazasynda quryldy. Ortalyqtyń ashylý saltanatyna Sý resýrstary jáne ırrıgatsııa vıtse-mınıstri Jandos Sálimov, Shveıtsarııa Konfederatsııasynyń Qazaqstan Respýblıkasyndaǵy elshisi Krıstına Honegger, GIZ uıymynyń óńirlik jobalarynyń jetekshisi Karolına Mılov jáne ortalyqtyń basqarma tóraǵasy Qaıratǵalı Haırýlla qatysty.
Ortalyq sý resýrstary salasyndaǵy ahýaldy jedel baǵalaýǵa jáne ondaǵy ózgeristerge ýaqytyly den qoıýǵa múmkindik beredi. Іs-sharaǵa qatysýshylarǵa ortalyqtyń jabdyqtary, onyń ishinde segiz ekrannan turatyn beıneqabyrǵa tanystyryldy.
Eske sala keteıik, Memleket basshysynyń tapsyrmasy boıynsha Sý resýrstary jáne ırrıgatsııa mınıstrliginiń Sý resýrstarynyń aqparattyq-taldaý ortalyǵy grant qarajaty esebinen Sý resýrstarynyń ulttyq aqparattyq júıesin ázirledi. Qazirgi ýaqytta júıe ónerkásiptik paıdalanýǵa engizildi.
Júıe 15 modýlden turady jáne 12 vedomstvolyq aqparattyq júıemen ıntegratsııalanǵan. Oǵan 23 myńnan astam sý nysany týraly derekter engizilgen. Sýǵa ótinish berýden bastap tutynylǵan sý úshin aqy tóleýge deıingi barlyq protsess avtomattandyrylǵan.
— Búginde sýdy uqypty paıdalaný ǵana emes, sonymen qatar onyń qolda bar qory, jaı-kúıi men paıdalanylýy týraly naqty aqparatqa ıe bolý da mańyzdy. Germanııa, Shveıtsarııa jáne GIZ uıymynyń qoldaýynyń arqasynda Sıtýatsııalyq ortalyqty qajetti tehnıkalyq jabdyqtarmen qamtamasyz ettik. Alda onyń múmkindikterin damytý, derektermen tolyqtyrý jáne jańa sheshimderdi engizý baǵytynda aýqymdy jumys kútip tur. Bizdiń barlyq kúsh-jigerimiz sý resýrstaryn utymdy paıdalanýǵa jáne olardy keler urpaq úshin saqtaýǵa baǵyttalǵan, — dedi Sý resýrstary jáne ırrıgatsııa vıtse-mınıstri Jandos Sálimov.
Buǵan deıin Qazaqstan men Germanııa sý salasynda iri jobalardy birlesip júzege asyratynyn jazdyq.
