Qazaqstannyń 200 myńǵa jýyq azamaty zańdy túrde syrtta jumys istep júr

ASTANA. KAZINFORM – Ulttyq quryltaıdyń úshinshi otyrysynda sóılegen sózinde Memleket basshysy Qasym-Jomart Toqaev osyndaı málimet keltirdi.

«Amerıkanyń ózinde Ortalyq Azııadaǵy kórshiles elderdiń myńdaǵan azamattary turyp jatyr. Kóbi bıznesin júrgizip, saýdamen aınalysady, arasynda qaltaly adamdar paıda bolýda. Biraq olar óziniń ulttyq ereksheligin joǵaltqan joq. Eń damyǵan elderdiń azamattary da shetel asyp, tabys tabýǵa namystanbaıdy. Zamanaýı kóshpendiler, Modern Nomads degenimiz – osy. Bul – búkil álemde bolyp jatqan úrdis», - deıdi Prezıdent.

Memleket basshysynyń sózinshe, sońǵy jyldary bizdiń de jastarymyz shetelge jıi shyǵa bastady. Qazir Qazaqstannyń 200 myńǵa jýyq azamaty zańdy túrde syrtta jumys istep júr. Tabys tabý úshin shetelde beıresmı eńbek etip júrgender de bar. Qaı jerde bolsyn, eńbektiń, kásiptiń jamany bolmaıdy. Tek bári zańdy bolýy kerek. Sonda memleket olardyń quqyǵyn qorǵap, qandaı bir jaǵdaı bolsa, kómektese alady.

«El ishinde nemese shetelde zańdy túrde jumys istep, tabys tabýǵa múmkindik týsa, odan bas tartpaǵan jón. Eń bastysy – adal eńbek etý, adal jolmen tabys tabý, adal azamat bolý», - dedi Qasym-Jomart Toqaev.