Qazaqstannyń 200 myń pedagogi ChatGPT Edu jobasyna qosylady
ASTANA.KAZINFORM - Memorandým aıasynda Qazaqstan Oqý-aǵartý mınıstrligi ChatGPT Edu pılottyq jobasyn iske qosýǵa daıyndyq júrgizip jatyr. 2026 jyly joba 200 myń pedagogti qamtıdy. Olar kúndelikti jumys júktemesin azaıtý úshin jasandy ıntellekt quraldaryn qoldanýdy meńgeredi.
Memleket basshysynyń tapsyrmalaryna sáıkes bilim berý salasyna jasandy ıntellekt engizý boıynsha keshendi jumystar júrgizilip jatyr. Qazirgi ýaqytta QazTech platformasynyń bazasynda Ulttyq bilim berý derekqory jańǵyrtylyp jatyr. Ol elektrondyq kúndelikter úshin biryńǵaı qoımaǵa aınalyp, bilim alýshylardyń tsıfrlyq profılderin qalyptastyrýǵa múmkindik beredi.
Sonymen qatar Ulttyq bilim berý platformasyn qurý josparlanyp otyr. Osylaısha jekelegen júıelerdiń ornyna bilim berý salasyndaǵy barlyq servıster men memlekettik qyzmetter bir platformada biriktiriledi. Nátıjesinde elektrondyq kúndelikter júrgizýden derekter men jasandy ıntellekt negizinde talanttardy basqarýǵa kóshý júzege asady.
Pılottyq jobanyń negizgi maqsaty álemdegi ozyq tehnologııalardyń biri ChatGPT júıesin bilim berý protsesine engizý arqyly oqytý sapasyn arttyrý, pedagogterdiń jumys tıimdiligin kúsheıtý jáne zertteý áleýetin damytý bolyp tabylady. Sonymen qatar joba jasandy ıntellekt negizinde akademııalyq protsesterdi avtomattandyrýdy odan ári damytýǵa baǵyttalǵan.
Memorandým aıasynda Qazaqstan Respýblıkasy Oqý-aǵartý mınıstrliginiń qajettilikteri úshin ChatGPT Edu boıynsha 100 myń lıtsenzııa bólindi. Olar bilim berý deńgeıleri boıynsha bólinedi. 5 myń lıtsenzııa mektepke deıingi uıymdarǵa, 85 myń lıtsenzııa orta bilim berý uıymdaryna, 10 myń lıtsenzııa kolledjderge beriledi. Jyldyń ekinshi jartysynda bul lıtsenzııalar qaıta bólinip, taǵy 100 myń pedagogke usynylady. Nátıjesinde 2026 jyly 200 myń pedagog jasandy ıntellekt quraldaryn tájirıbe júzinde qoldaný daǵdylaryn meńgeredi.
Joba aıasynda árbir pedagog ózine arnalǵan «aqyldy assıstentke» ıe bolady. ChatGPT Edu birneshe mınýt ishinde sabaq josparyn daıyndaýǵa, tapsyrmalar men testter qurastyrýǵa, oqý materıaldaryn ártúrli deńgeıdegi oqýshylarǵa beıimdeýge, sondaı-aq olardy qazaq, orys jáne aǵylshyn tilderinde ázirleýge múmkindik beredi. Sabaq barysynda bul qural pedagogke kúrdeli taqyryptardy qarapaıym ári túsinikti tilmen túsindirýge, ómirlik mysaldar qoldanýǵa, sabaq formatyn pikirtalasqa, birlesken jobaǵa nemese zertteý jumysyna aınaldyrýǵa kómektesedi.
Sonymen qatar ChatGPT Edu baǵalaý krıterıılerin ázirleýge, oqýshylardyń jumystaryn aldyn ala taldaýǵa jáne árbir bilim alýshyǵa jeke keri baılanys daıyndaýǵa qoldaý kórsetedi. Bul rette qorytyndy baǵany árqashan pedagogtiń ózi qoıady. Platforma pedagogterdiń kásibı damýyna da múmkindik beredi. Muǵalimder zamanaýı oqytý ádisterin meńgerip, oqý kýrstaryn jańartyp, ádistemelik materıaldar ázirleı alady jáne jańa tsıfrlyq ári jasandy ıntellekt tájirıbelerin ıgeredi.
Aıta keteıik, Qazaqstanda JI tehnologııalaryn mektep tájirıbesine engizýdiń ádistemelik negizderi bekitildi. Tıisti talaptar men shekteýler Y.Altynsarın atyndaǵy Ulttyq bilim akademııasy ázirlegen qujatta naqtylandy.
