Qazaqstannyń 19 oqý ornynda avtoónerkásip mamandary daıarlanyp jatyr
ASTANA. KAZINFORM — Avtomobıl ónerkásibi úshin kadr daıarlaý elimizdiń 19 joǵarǵy oqý ornynda 34 bilim berý baǵdarlamasy boıynsha júzege asyrylyp keledi. Ǵylym jáne joǵary bilim mınıstri Saıasat Nurbek avtoóndiriske kadr daıarlaý boıynsha júrgizilip jatqan jumystardy baıandady.
Mınıstrdiń aıtýynsha, búginde avtokólik óndirisine qajetti ınjenerlik mamandyqtar boıynsha 4 myńǵa jýyq stýdent bilim alyp jatyr. Bıyl osy baǵyttarǵa 3 myńnan astam memlekettik grant bólingen.
— Sonymen qatar «Bolashaq» halyqaralyq baǵdarlamasy arqyly da álemdik deńgeıdegi mamandar daıarlanyp keledi. Osy ýaqytqa deıin 176 maman daıyndaldy. Qazir 23 stıpendıat Germanııa, Ulybrıtanııa, AQSh, Chehııa, Japonııa, Qytaı, Italııa jáne basqa da elderde bilim alyp, ǵylymı taǵylymdamadan ótip jatyr, — dedi mınıstr.
Onyń aıtýynsha, Memleket basshysynyń tapsyrmasymen 2024 jyldan bastap ınjenerlik kadrlardy daıarlaýdyń jańa modeli engizilip jatyr. Bul júıe ınjenerlik bilimdi birizdendirýge, oqý baǵdarlamalaryn jańartýǵa, ǵylym men óndiris arasyndaǵy baılanysty kúsheıtýge jáne mamandardyń kásibı damýyna jańa múmkindikter jasaýǵa baǵyttalǵan.
Búginde elimizde 9 salalyq jáne 20 óńirlik jańa kásipter men quzyretter atlasy ázirlengen. Olardyń qatarynda «Mashına jasaý» jáne «Kólik jáne logıstıka» salalarynyń atlastary, sondaı-aq Qaraǵandy men Qostanaı oblystarynyń óńirlik atlastary avtomobıl jasaý salasyna qajetti mamandyqtardy qamtıdy.
Nátıjesinde 31 jańa mamandyq engizilip, 22 qoldanystaǵy mamandyqtyń mazmuny jańartylady. Osyǵan baılanysty joǵary oqý oryndary bilim berý baǵdarlamalaryn qaıta qarap jatyr. Mınıstr aldaǵy ýaqytta bul atlastardy óndiris oryndarymen birlesip turaqty túrde jańartyp otyrý mańyzdy ekenin atap ótti.
Aıta keteıik, Úkimet otyrysynda mashına jasaý salasyn damytý máselesi qaralyp jatyr.
