Qazaqstannyń 18 mıllıonynshy turǵyny mektepke barýǵa daıyndalyp júr
Kazinform halyqaralyq aqparat agenttigi mıllıondyq mejeni baǵyndyrǵan qazaqstandyqtar týraly maqalalar toptamasyn jalǵastyrady. Elimizdiń 18 mıllıonynshy turǵyny atanǵan Múslıma Samatqyzy Taldyqorǵan qalasynda daıarlyq synybyna baryp júr. Búldirshinniń anasy Dıana Omarhanova agenttikke arnaıy suhbat berip, mıllıondyq balanyń ata-anasy bolý úlken jaýapkershilik júkteıtinin aıtyp berdi.
Múslıma Samatqyzy 2017 jyly 11 mamyrda Taldyqorǵan qalasynda dúnıege keldi. Otbasynda ekinshi bala.
«Qyzymyz mektepaldy daıarlyq tobyna baryp júr. Múslıma óte zerek, oqýǵa yntasy óte jaqsy, sabaq oqyǵandy jaqsy kóredi. Qosymsha úıirmelerge barady. Sýret salǵandy jaqsy kóredi. Kórkem gımnastıkamen aınalysady. Qalalyq baıqaýlarda túrli oryn alyp úlgerdi. Ázirge osyndaı jetistikterimiz bar», — deıdi D. Omarhanova.
Sol kezdegi Almaty oblysynyń ákimi bolǵan Amandyq Batalov Múslımanyń otbasyna úsh bólmeli páter tartý etken. Qazirgi ýaqytta otbasy osy páterde turyp jatyr.
Múslımanyń ata-anasy Taldyqorǵannyń № 29 orta mektebinde jumys isteıdi. Anasy defektolog, ákesi — dene tárbıesi pániniń muǵalimi.
Keıipkerimizdiń Sultan atty aǵasy, Ámına degen sińlisi bar.
«Úsh balamyzdyń arasyndaǵy minezi salmaqty, baısaldysy osy Múslıma qyzymyz. Minezi tuıyqtaý, qyz balaǵa tán uıań qalpy bar. Týǵanda kópshiliktiń batasyn alǵan qyz, áli de jaqsy ıgi tilekter estip kele jatyrmyz. Aýyldaǵy ata-ájesiniń tárıbesin, tálimin alyp keledi. Osynyń bári balanyń minezine yqpal etetin shyǵar. Múslıma kishkentaı bolsa da, armany ózinen úlken. Dızaıner bolǵysy keledi, kásipker bolamyn deıdi. Sýretti de jaqsy salady, sýretshi bolǵysy keledi», — deıdi Dıana Omarhanova.
Suhbat sońynda Múslımanyń anasy 20 mıllıonynshy bop týǵan sábılerdiń ata-anasy men tutas qazaq halqyn quttyqtady.
«Bul — barsha elimizdiń ortaq qýanyshy dep bilemin. Osy sátti paıdalanyp, halqymyzdy búgingi jaqsy jańalyqpen quttyqtaǵym keledi. Elimizdiń bolashaǵy osy ósip kele jatqan búldirshinderdiń qolynda. Elimizdiń demografııasy ósip-órkendeı bersin!», — dedi ol.
Aıta keteıik, 14 qarasha tańǵy saǵat 8.10-da týǵan 5 bala elimizdiń 20 mıllıonynshy turǵyny atandy.
Qazaqstannyń mereıli azamattary Ulytaý, Jetisý, Atyraý, Aqmola jáne Túrkistan oblystarynda dúnıege keldi.
Al Qazaqstannyń 17 mıllıonynshy turǵyny Altynbek Esqara 10 jasqa toldy, ol Shymkent qalasynda turady.
Buǵan deıin demograf Aıaýlym Saǵynbaeva Qazaqstanǵa halyq sanynyń ósýi nelikten mańyzdy ekenin túsindirgen edi.
