Qazaqstannyń 18 qalasynda «Ózbekáli» spektakli sahnalanady

– Atalǵan qoıylym byltyr alǵash ret sahnalanyp, kórermen tarapynan ystyq yqylasqa ıe bolǵan edi. Spektaklde Ózbekáli Jánibektiń ulttyq mádenıet pen salt-dástúrdi jańǵyrtý jolyndaǵy eren eńbegi, rýhanı bolmysy men tulǵalyq kelbeti kórkemdik turǵyda tereń ashylady. Ótken jyly Batys óńiri spektakldi erekshe yqylaspen qabyldady. Bıyl Ózbekáli Jánibektiń týǵanyna 95 jyl tolýyna oraı bastamany jalǵaýdy sheshtik, – deıdi joba jetekshisi, prodıýser Qaırat Kenjebekuly.

Spektaklde tarıhı tulǵanyń beınesin naqty kórsetýge erekshe mán berilgen.

– Almatyda Baýyrjan esimdi uly bar, ruqsatyn aldyq, oıyn aıtty. Ózbekáli Jánibektiń jaqyndary «kózqarasyń, mineziń uqsady» dep rólime oń baǵa berdi. Qaıtpas qaısar minezi bolmasa, mádenıetimiz aqsar edi degen sekildi oılar aıtylady. Kózin kórgen kisilermen suhbattasa otyra róldi tolyqtyrdyq. Meniń maqsatym – obrazdan shyǵý, – deıdi Ózbekáli rólin somdaǵan akter Dıas Jaǵyparov.

Spıkerlerdiń aıtýynsha, bıyl spektakl burynǵy nusqamen salystyrǵanda tolyqtyrylǵan, rejısseri de aýysqan.

– Gastroldi joǵary deńgeıde atqarǵymyz keledi. Sapar mamyrdyń 10-na deıin jalǵasady. Aldaǵy ýaqytta atamyzdyń esimin ulyqtap, fılm túsirý de oıymyzda. Budan bólek, kelesi kezekte akademık Qanysh Sátpaev jaıly spektakl jazylyp jatyr, – dep bólisti joba jetekshisi.

Eske sala keteıik, buǵan deıin Astanada jasandy ıntellektiniń kómegimen jasalǵan alǵashqy spektakl qoıyldy.