Qazaqstannyń 17 jasqa deıingi boksshylary Azııa chempıonatynda 10 altyn aldy
ASTANA. KAZINFORM - Iordanııa astanasy Amman qalasynda 17 jasqa deıingi jasóspirimder arasyndaǵy Azııa chempıonaty máresine jetti.
Qurlyqtyq doda World Boxing aıasynda alǵash ret ótti. Onda elimizdiń uldar jáne qyzdar quramalary barlyǵy 10 altyn medal aldy. Onyń 5-eýi uldarǵa buıyrsa, 5-eýi qyzdardyń enshisine tıdi.
El quramasynan uldar arasynda Jumaǵalı Nurmahan (46 keli), Temiralı Temirbaev (52 keli), Dosjan Jumahan (54 keli), Sanjar Matasov (75 keli), Muhamedalı Rústembek (80 keli) chempıondyq ataqqa qol jetkizse, Halıf Rasýl (50 keli) kúmis júldeger boldy.
Al Rústem Saparhan (48 keli), Anvar Idrısov (60 keli), Danııal Shalqarbaı (66 keli) qola medal aldy.
Atalǵan jastaǵy boksshylardy jarysqa aǵa bapker Baǵdat Ońǵarbekov daıyndady.
Al qyzdar quramasynda Maral Tólepbergen (52 keli), Aıaýlym Ospanova (63 keli), Dılıara Tursynbek (66 keli), Kamıla Ospanova (70 keli), Dıana Nadyrbek (75 keli) jeńis tuǵyryna kóterilse, Farıza Tájibaeva (80 keli) kúmis júldege qol jetkizdi.
Sondaı-aq Shuǵyla Jaras (46 keli), Lashyn Dáýletjan (48 keli), Balym Ǵabıtqyzy (54 keli), Indıra Qydyrmoldaeva (57 keli), Aıdana Ábdikerim (60 keli) jáne Elnýra Qońyrat (80 keliden joǵary) úzdik úshtikti túıindedi.
Qyzdardy qurlyqtyq dodaǵa aǵa bapker Aıbek Ábilda daıyndady.
Eske salsaq, budan buryn qazaqstandyq 15 jasqa deıingi boksshylar qurlyqtyq dodada 6 altyn medal aldy.