Qazaqstannyń 17 jas ǵalymy páter sertıfıkattaryn ıelendi
ASTANA. KAZINFORM — QR Ǵylym jáne joǵary bilim mınıstrliginiń keńeıtilgen alqa otyrysynda Memleket basshysynyń tapsyrmasy boıynsha Ǵylym jáne joǵary bilim mınıstri Saıasat Nurbek 17 jas ǵalymǵa páter sertıfıkattaryn saltanatty túrde tabystady.
Prezıdenttiń 2024 jylǵy 31 mamyrda «Ǵylym ordasynda» jas ǵalymdarmen kezdesýinde bergen tapsyrmasyn oryndaý maqsatynda ǵalymdardyń áleýmettik mártebesin kóterý jáne qoldaý kórsetý, sondaı-aq ǵylymǵa jas kadrlardyń kelýin yntalandyrý úshin Komıssııa Almaty qalasynda baspana berý úshin memlekettik organdarǵa vedomstvolyq baǵynysty ǵylymı uıymdardyń, joǵary jáne joǵary oqý ornynan keıingi bilim berý uıymdarynyń jas ǵalymdarynyń kezekti tizimin aıqyndady.
QR Ǵylym jáne joǵary bilim mınıstrligi 2024 jylǵy mamyr aıynan bastap baspanaǵa muqtaj jas ǵalymdardyń (40 jasqa deıin qosa alǵanda) tizimin qalyptastyrý boıynsha jumys júrgizýde. Almaty qalasynda ornalasqan memlekettik organdarǵa vedomstvolyq baǵynysty ǵylymı uıymdar men joǵary oqý oryndarynan 300-ge jýyq ótinim kelip tústi.
QR Ǵylym jáne joǵary bilim mınıstrligi bul jumysty kezeń-kezeńimen júrgizýde. Jas ǵalymdar sanynyń artýy ǵylymnyń damýyna, ǵylymı jáne ǵylymı-tehnıkalyq qyzmet nátıjelerin kommertsııalandyrýǵa, sondaı-aq jańa ekonomıkalyq klasterler qurýǵa oń áser etedi.
Aıta keteıik, Memleket basshysynyń tapsyrmasymen ótken jyly 25 jas ǵalym turǵyn úı sertıfıkattaryn aldy. Sonymen qatar 2023 jylǵy 19 qazanda QR Ǵylym jáne joǵary bilim mınıstrligi men «Otbasy bank» AQ arasynda jas ǵalymdarǵa 2023-2027 jyldarǵa arnalǵan jeńildetilgen kredıt berý baǵdarlamasy boıynsha yntymaqtastyq týraly kelisimge qol qoıdy.
Qazirgi ýaqytta atalǵan baǵdarlama boıynsha 290 jas ǵalym jeńildikpen baspana aldy.
Jaqynda Prezıdenttiń tapsyrmasymen 5 jas ǵalym páterli bolǵan.