Qazaqstannyń 17 óńirinde aýa raıyna baılanysty eskertý jarııalandy
ASTANA. KAZINFORM – 30 maýsymǵa Qazaqstannyń 17 óńirinde, sondaı-aq Astana, Almaty jáne Shymkent qalalarynda eskertý jarııalandy. Bul týraly «Qazgıdromet» RMK-sy habarlady.
Sınoptıkterdiń boljamynsha, eldiń birqatar aımaǵynda nóser jaýyn, naızaǵaı, burshaq, ekpindi jel jáne aptap ystyq kútiledi. Keı óńirlerde aýa temperatýrasy +38 gradýsqa deıin kóteriledi. Sonymen qatar órt qaýpi joǵary bolady.
Abaı, Aqmola, Aqtóbe, Shyǵys Qazaqstan, Pavlodar, Soltústik Qazaqstan, Batys Qazaqstan, Qostanaı jáne Ulytaý oblystarynda jańbyr jaýyp, naızaǵaı oınaıdy. Keı jerlerde burshaq túsip, kúshti jel soǵady. Jel ekpini sekýndyna 20–25 metrge deıin jetedi.
Almaty, Jetisý, Jambyl jáne Túrkistan oblystarynda ótkinshi jańbyr jaýyp, naızaǵaı oınady. Jekelegen aýdandarda burshaq jaýyp, shańdy daýyl turýy múmkin. Jel ekpini 20–28 m/s deıin kúsheıedi.
Atyraý men Mańǵystaý oblystarynda nóser jańbyr jaýyp, burshaq túsýi yqtımal. Sınoptıkter 2 shildege deıin mol jaýyn-shashyn bolatynyn eskertti.
Qaraǵandy men Qyzylorda oblystarynda jańbyr, naızaǵaı jáne ekpindi jel boljanyp otyr. Jel jyldamdyǵy sekýndyna 20–23 metrge deıin jetýi múmkin.
Abaı, Almaty, Jetisý jáne Shyǵys Qazaqstan oblystarynda kún qatty ysıdy. Aýa temperatýrasy +35…+38 gradýsqa deıin kóteriledi. Shyǵys Qazaqstanda mundaı ystyq 5 shildege deıin saqtalmaq.
Óńirlerdiń basym bóliginde joǵary jáne tótenshe órt qaýpi saqtalady.
Astanada kúndiz jańbyr jaýyp, naızaǵaı oınaıdy, burshaq túsýi múmkin. Ońtústik-batystan soǵatyn jeldiń ekpini 15–20 m/s bolady.
Almatyda kúndiz ótkinshi jańbyr jaýyp, naızaǵaı kútiledi. Jel ekpini 15–18 m/s-qa jetip, aýa temperatýrasy +35 gradýsqa deıin kóteriledi.
Shymkentte jańbyr jaýyp, naızaǵaı oınaıdy. Jel ekpini 20 m/s-qa deıin kúsheıedi.
Osyǵan deıin jazǵy demalysta balalardyń qaýipsizdigi kúsheıtilgeni týraly jazdyq.
