Qazaqstannyń 16 óńirinde aýa raıyna baılanysty eskertý jarııalandy
ASTANA. KAZINFORM – «Qazgıdromet» RMK 30 shilde men aldaǵy kúnderge elimizdiń 16 oblysynda aýa raıyna baılanysty eskertý jarııalady.
Sınoptıkterdiń boljamynsha, óńirlerde aptap ystyq, naızaǵaı, burshaq, daýyldy jel, shańdy daýyl men tuman kútiledi. Sonymen qatar joǵary jáne tótenshe órt qaýpi saqtalady.
Aqmola, Aqtóbe, Abaı, Shyǵys Qazaqstan, Batys Qazaqstan, Qostanaı, Soltústik Qazaqstan, Pavlodar oblystarynda jańbyr jaýyp, naızaǵaı oınaıdy. Keı jerlerde burshaq túsip, jeldiń ekpini sekýndyna 15–23 metrge deıin jetedi.
Al Almaty, Jetisý, Jambyl, Qaraǵandy, Ulytaý, Mańǵystaý, Túrkistan oblystarynda jáne Shymkent qalasynda aptap ystyq saqtalady. Keıbir óńirlerde aýa temperatýrasy 40–42 gradýsqa deıin kóterilse, 31 shilde men 1–2 tamyzda Abaı, Qaraǵandy jáne Ulytaý oblystarynyń ońtústiginde 41 gradýsqa deıin ystyq bolady.
Túrkistan oblysynda shańdy daýyl soǵyp, jeldiń ekpini 23–28 m/s-qa deıin kúsheıedi.
Sondaı-aq sınoptıkter elimizdiń kóptegen óńirinde joǵary jáne tótenshe órt qaýpi saqtalatynyn eskertti.
Elordada 30 shildede kúndiz aýa temperatýrasy 35 gradýsqa deıin kóteriledi. Almatyda tótenshe órt qaýpi saqtalady. Shymkentte aýa temperatýrasy 40 gradýsqa deıin jetip, soltústik-shyǵystan soǵatyn jeldiń ekpini 15–20 m/s bolady.
