Qazaqstannyń 15 óńirinde jańbyr jaýyp, jel kúsheıedi
ASTANA. KAZINFORM — Qazaqstannyń 15 óńiriniń turǵyndaryna jańbyr, naızaǵaı, tumanǵa baılanysty eskertý jarııalandy, dep habarlaıdy «Qazgıdromet» RMK baspasóz qyzmeti.
Abaı oblysynyń soltústigi men shyǵysynda jańbyr jaýyp, naızaǵaı oınaıdy. Túnde jáne tańerteń oblystyń soltústiginde tuman túsedi. Soltústik jáne shyǵys bólikterinde soltústik-batystan soǵatyn jeldiń jyldamdyǵy 15-20 m/s bolady. Oblystyń ońtústik-batysynda tótenshe órt qaýpi saqtalady.
Aqtóbe oblysynyń soltústiginde túnde, batysynda, soltústiginde jáne ońtústiginde kúndiz jańbyr jaýyp, naızaǵaı oınaıdy. Ońtústikten soǵatyn jel keıin soltústik-batysqa aýysyp, kúndiz oblystyń soltústigi, ońtústigi men ortalyǵynda ekpini 15-20 m/s-qa jetedi. Ortalyq jáne soltústik-shyǵys bólikterinde joǵary órt qaýpi, oblystyń basym bóliginde tótenshe órt qaýpi saqtalady.
Almaty oblysynyń taýly aýdandarynda túnde jaýyn-shashyn (jańbyr, qar) jaýyp, tuman túsedi. Soltústik-shyǵystan, soltústikten soǵatyn jel taýly aýdandarda 18 m/s-qa deıin kúsheıedi. Ortalyq, batys jáne ońtústik bólikterinde tótenshe, shyǵysynda joǵary órt qaýpi saqtalady.
26 tamyzda Atyraý oblysynyń ońtústigi men shyǵysynda azdaǵan jańbyr jaýyp, naızaǵaı oınaıdy. Kúndiz oblystyń soltústigi men shyǵysynda shańdy daýyl bolady. Ońtústik-batystan soǵatyn jel keıin soltústikke aýysyp, soltústik jáne shyǵys bólikterinde ekpini 15-18 m/s-qa jetedi. Oblysta tótenshe órt qaýpi saqtalady.
Aqmola oblysynyń batysy men ońtústiginde túnde jáne tańerteń tuman túsedi.
Shyǵys Qazaqstan oblysynda jańbyr jaýyp, naızaǵaı oınaıdy. Soltústik jáne shyǵys bólikterinde keı ýaqytta qatty jańbyr jaýyp, kúndiz burshaq jaýyp, daýyl bolýy múmkin. Túnde jáne tańerteń soltústik pen shyǵysta tuman túsedi. Soltústik, shyǵys jáne ońtústikte soltústik-batystan soǵatyn jeldiń jyldamdyǵy 15-20 m/s bolady.
Jambyl oblysynda ońtústik-batysta, soltústik-shyǵysta jáne taýly aýdandarda soltústik-shyǵystan soǵatyn jeldiń jyldamdyǵy 15-20 m/s-qa jetedi. Tótenshe órt qaýpi, oblystyń shyǵysynda joǵary órt qaýpi saqtalady.
Jetisý oblysynyń shyǵysy men taýly aýdandarynda jańbyr jaýyp, naızaǵaı oınaıdy. Túnde jáne tańerteń taýly aýdandarda tuman túsedi. Shyǵysta soltústik-shyǵystan soǵatyn jeldiń ekpini 15-20, kúndiz keı ýaqytta 23-28 m/s-qa deıin kúsheıedi. Ortalyq, ońtústik jáne shyǵys bólikterinde tótenshe órt qaýpi saqtalady.
Batys Qazaqstan oblysynda tótenshe órt qaýpi, soltústik-batysynda joǵary órt qaýpi saqtalady.
Qaraǵandy oblysynyń soltústigi men shyǵysynda túnde jáne tańerteń tuman túsedi. Oblystyń ońtústiginde tótenshe órt qaýpi saqtalady.
Qostanaı oblysynyń batysy men soltústiginde kúndiz jańbyr jaýyp, naızaǵaı oınaıdy. Túnde jáne tańerteń soltústiginde tuman túsedi. Kúndiz batysy men soltústiginde ońtústik-batystan soǵatyn jeldiń ekpini 15-20 m/s bolady. Ońtústiginde kúndiz aptap ystyq 35 gradýsqa deıin jetedi. Soltústik-batysy men shyǵysynda joǵary, ońtústigi, ońtústik-shyǵysy men ortalyǵynda tótenshe órt qaýpi kútiledi.
Mańǵystaý oblysynyń batysy, soltústigi men ortalyǵynda jańbyr jaýyp, naızaǵaı oınaıdy. Batystan, soltústik-batystan soǵatyn jeldiń ekpini 15-20 m/s bolady. Kúndiz aýa temperatýrasy 38-39 gradýsqa deıin kóteriledi. Batysy men soltústiginde tótenshe órt qaýpi saqtalady.
Pavlodar oblysynyń ońtústigi men shyǵysynda azdaǵan jańbyr jaýyp, naızaǵaı oınaıdy. Túnde jáne tańerteń soltústigi men shyǵysynda tuman túsedi.
Soltústik Qazaqstan oblysynyń ońtústigi men shyǵysynda túnde jáne tańerteń tuman túsedi. Kúndiz batysy, soltústigi men ońtústiginde ońtústik-shyǵystan soǵatyn jeldiń ekpini 15-20 m/s bolady.
Ulytaý oblysynyń shyǵysynda túnde jáne tańerteń tuman túsedi. Tótenshe órt qaýpi saqtalady.
Osydan buryn Shyǵys Qazaqstanda kúzdiń alǵashqy aıynda aýa raıy qubylmaly bolatyny aıtyldy.
