Qazaqstannyń 15 óńirinde kún raıyna baılanysty eskertý jarııalandy

ASTANA. KAZINFORM - 12 qazanda elimizdiń 15 oblysynda jáne Astana qalasynda aýa raıyna baılanysty eskertý jarııalandy.

«Qazgıdromet» RMK-sy boljamyna qaraǵanda, Astanada soltústik-shyǵystan, shyǵystan soǵatyn jeldiń ekpini kúndiz 15–20 m/s deıin jetedi.

Túrkistan oblysynyń taýly jáne taý bókterindegi aýdandarynda kúndiz ońtústik-batystan soǵatyn jeldiń kúshi 15–20 m/s deıin kúsheıedi. Óńirdiń soltústigi, ońtústigi, batysy men shóldi aımaqtarynda tótenshe órt qaýpi saqtalady. Shymkent qalasynda da jeldiń ekpini kúndiz 15–20 m/s deıin jetýi múmkin.

Almaty oblysynyń soltústiginde tótenshe, al batysynda joǵary órt qaýpi saqtalady.

Batys Qazaqstan oblysynyń batysynda, soltústiginde jáne shyǵysynda naızaǵaı oınaıdy. Jel ońtústikten, ońtústik-batystan soǵyp, oblystyń batysy men ońtústiginde kúndiz 15–20 m/s deıin kúsheıedi. Soltústigi men ortalyǵynda joǵary, al soltústik-batysy, ońtústigi jáne ońtústik-shyǵysynda tótenshe órt qaýpi saqtalady.

Aqtóbe oblysynyń ońtústigi, soltústigi jáne shyǵysynda joǵary, al batysy men ortalyǵynda tótenshe órt qaýpi saqtalady.

Qyzylorda oblysynda tótenshe órt qaýpi saqtalady.

Ulytaý oblysynyń ońtústiginde tótenshe, al shyǵysy men ortalyǵynda joǵary órt qaýpi boljanady.

Qaraǵandy oblysynyń soltústigi men shyǵysynda túnde jáne tańerteń tuman kútiledi. Jel soltústik-shyǵystan, shyǵystan soǵady, tańerteń jáne kúndiz soltústiginde 15–18 m/s deıin kúsheıedi.

Abaı oblysynyń batysy, soltústigi jáne ortalyǵynda túnde, al kúndiz batysy men ortalyǵynda tuman men kóktaıǵaq kútiledi. Jel soltústikten, soltústik-shyǵystan soǵyp, kúndiz ońtústik-batysynda ekpini 15–20 m/s deıin jetedi. Óńirdiń ońtústiginde joǵary órt qaýpi saqtalady.

Jambyl oblysynyń taýly aýdandarynda túnde jáne tańerteń tuman túsedi. Oblystyń ońtústik-batysy, soltústik-shyǵysy men taýly aımaqtarynda jeldiń ekpini 15–20 m/s, keı jerlerde 23–28 m/s deıin kúsheıedi. Túnde taýly jerlerde 1°S shamasynda úsik júrýi múmkin. Batysy men soltústiginde tótenshe, ortalyǵynda joǵary órt qaýpi saqtalady.

Shyǵys Qazaqstan oblysynyń soltústigi men shyǵysynda túnde jáne tańerteń, al kúndiz batysy men soltústiginde tuman men kóktaıǵaq kútiledi. Jel shyǵystan soltústik-batysqa aýysyp, kúndiz soltústiginde 15–20 m/s deıin jetedi.

Jetisý oblysynda jel soltústik-shyǵystan soǵyp, shyǵysy men taýly aımaqtarynda ekpini 15–20 m/s deıin kúsheıedi. Túnde 1–6°S aralyǵynda úsik kútiledi. Ońtústiginde joǵary órt qaýpi saqtalady.

Túnde jáne tańerteń Mańǵystaý oblysynyń batysy men soltústiginde tuman kútiledi. Oblys aýmaǵynda órt qaýpi joǵary deńgeıde saqtalady.

Túnde jáne tańerteń Atyraý oblysynyń batysynda tuman túsedi. Oblystyń soltústiginde, ońtústiginde jáne shyǵysynda órttiń tótenshe qaýpi saqtalady, al soltústik-shyǵysy men batysynda órt qaýpi joǵary bolady.

Aqmola oblysynda soltústik-shyǵystan jáne shyǵystan soǵatyn jeldiń ekpini túnde oblystyń batysynda, ońtústiginde jáne shyǵysynda 15–20 m/s-qa deıin, kúndiz 15–20 m/s-qa deıin jetedi. Oblystyń ońtústik-batysynda órt qaýpi joǵary deńgeıde saqtalady.

Soltústik Qazaqstan oblysynda túnde jáne kúndiz jeldiń soltústik-shyǵystan soǵatyn ekpini 15–20 m/s-qa deıin, al oblystyń ońtústik-batysynda 23 m/s-qa deıin kúsheıedi.

Osyǵan deıin Fılıppındegi qýatty jer silkinisi saldarynan 7 adam mert bolǵany týraly jazdyq.