Pavlodarda qoǵamdyq kólikti sýbsıdııalaýǵa 20 mlrd teńgege jýyq qarajat qarastyrylǵan
PAVLODAR. KAZINFORM — Sýbsıdııa bólinbegen jaǵdaıda jolaqynyń ortasha quny Pavlodar qalasynda — 500, Aqsý qalasynda — 600, Ekibastuzda 540 teńge bolar edi. Óńirlik jolaýshylar kóligi jáne avtokólik joldary basqarmasynyń dereginshe, oblys boıynsha 122 áleýmettik baǵytqa bıýdjetten sýbsıdııa qarastyrylǵan.
— Pavlodar oblysynda áleýmettik mańyzy bar marshrýttardy sýbsıdııalaýǵa jalpy sıpattaǵy transfertterdi esepteý bazasyna sáıkes 19,7 mlrd teńge bólinedi. Óńirdegi úsh qaladaǵy avtobýs parkterinde 300 avtobýs bar. Sońǵy 3 jylda 272 jańa ári jaıly avtobýs satyp alyndy, Nátıjesinde qalalyq avtobýs parkteri 90%-ǵa jańardy. Atap aıtqanda, Pavlodarda — 213, Ekibastuzda — 49, Aqsýda 10 jańa qoǵamdyq kólikter kúndelikti jolaýshylardy tasymaldaıdy. Qalǵan 28 avtobýsty 2026 jyldyń sońyna deıin jańartý josparlanǵan, — dep habarlady Kazinform tilshisine basqarma basshysynyń orynbasary Narıman Omar.
Onyń sózinshe, oblystyń úsh qalasy boıynsha qoǵamdyq kóliktegi jolaqy elektrondy tólem kezinde 100 teńge, al qolma-qol aqshamen 200 teńge bolyp belgilengen.
Eger bıýdjetten sýbsıdııa bólinbegen jaǵdaıda ortasha jolaqysy Pavlodar qalasynda — 500 teńge, Ekibastuz qalasynda — 540 teńge, al Aqsý qalasynda — 600 teńge bolar edi.
Atap óterligi, 2025 jyly áleýmettik mańyzy bar qoǵamdyq kólik baǵyttaryna oblys boıynsha 18,6 mlrd tenge bólingen.
Buǵan deıin Astana men Pavlodar arasyna reıstik avtobýs júre bastaǵany týraly jazǵanbyz.
Sondaı-aq Pavlodarda qoǵamdyq kólikti ońtaılandyrýdyń nátıjesinde 4 mlrd teńge qarajat únemdelgenin habarlaǵanbyz.