Qazaqstannyń 14 óńirinde negizgi UBT bastaldy
ASTANA. KAZINFORM – Búgin elimizdiń 14 aımaǵy úshin negizgi UBT bastaldy, testileý 5 shildege deıin jalǵasady. Al sý tasqyny bolǵan 6 óńirde UBT 25 mamyrda bastalady.
Atap aıtqanda, tótenshe jaǵdaı rejımi jarııalanǵan Aqmola, Aqtóbe, Atyraý, Batys Qazaqstan, Qostanaı, Soltústik Qazaqstan oblystarynda tirkelý ýaqyty 20 mamyrǵa deıin uzartyldy, UBT 25 mamyr men 12 shilde aralyǵynda ótkiziledi.
«Ótken jylmen salystyrǵanda UBT tapsyrýshylar sany 20 myńǵa artqan, onyń bir sebebi – elimizde demografııanyń ósýi bolsa, ekinshi sebebi – jurtshylyqtyń testileýge seniminiń artýy. 2023 jyly 162 myń talapker UBT-ny 291 myń ret tapsyrǵan edi. Al bıyl 181 myń talapker testileýge qatysýǵa nıet bildirgen. Eki múmkindikti esepke alǵanda, qazirgi tańda 330 myńǵa jýyq ótinish qabyldandy», - dedi QR Ǵylym jáne joǵary bilim mınıstrligi Ulttyq testileý ortalyǵynyń dırektory Bolatbek Abdrasılov Ortalyq kommýnıkatsııalar qyzmetinde.
UBT jylyna 5 ret ótkiziledi: úsh ret – aqyly negizde. Al negizgi UBT negizinde talapkerler granttar berý konkýrsyna qatysý múmkindigine ıe bolady.
«Bir mezgilde 5 172 kompıýter testileýdi ótkizýge múmkindik beredi. Sońǵy jyldary UBT elektrondy formatta ótkiziledi. Bul túlekterge testileý nátıjesin birden alýǵa múmkindik beredi», - dedi spıker.
Talapkerlerdiń basym bóligi – 75%-y emtıhandy qazaq tilinde tapsyrýdy tańdaǵan. 25%-ǵa jýyq testilenýshi orys tilin, 221 adam aǵylshyn tilinde test tapsyrýdy uıǵarǵan.
