Qazaqstannyń 11 óńirinde jylytý maýsymy bastaldy

ASTANA. KAZINFORM — Elimizdiń 11 óńirinde jylytý maýsymy bastaldy. 1 qarashaǵa deıin qalǵan óńirlerde jylýmen jabdyqtaýdy bastaý josparlanǵan.

Bul týraly Premer-mınıstrdiń birinshi orynbasary Roman Sklıar Úkimet otyrysynda baıandady.

— Úkimettiń sońǵy otyrysynan bastap 1 energııa blogy, 10 qazandyq jáne 12 týrbına jóndeldi. Sondaı-aq 29 shaqyrym jylý jelilerinde, 828 shaqyrym elektr jelisinde jáne 16 qosalqy stantsııalarda jóndeý jumystary aıaqtaldy. Jalpy kestege sáıkes, 7 energoblokta, 34 qazandyqta jáne 24 týrbınada jóndeý júrgizildi, — dedi R. Sklıar.

Qazan aıynda 1 energoblokta, 25 qazandyqta jáne 13 týrbınada jóndeýdi aıaqtaý josparlanyp otyr. Jylý jáne elektr jelilerindegi jóndeý jumystary aıaqtaldy.

— Oral qalasynda jylý jelilerin jóndeý aıaqtaldy. Aıagózde jylytý maýsymy 29 qyrkúıekte bastaldy, ondaǵy 2 rezervtik qazandyqty jóndeý jumystary aıaqtalýda. Sátpaevta jylytý maýsymy 3 qazanda bastaldy. Birinshi jáne tórtinshi qazandyqtardaǵy jumystar aıaqtalyp qaldy. Jalpy jumys belgilengen kestege sáıkes júrgizilip jatyr, — dedi birinshi orynbasar.

Aıta keteıik, Petropavlda keı úılerge jylý berý keshiktirilip jatyr.

Búgin Aqtaýda jylý berý maýsymy bastalady.