Qazaqstannyń 11 óńirinde jańa zamanaýı kolledjder salynady
ASTANA. KAZINFORM — Qazaqstannyń 11 óńirinde jalpy 20 myń orynǵa arnalǵan 13 zamanaýı kolledj salý josparlanyp otyr. Bul týraly Oqý-aǵartý mınıstri Juldyz Súleımenova Úkimet otyrysynda aıtty.
Mınıstrdiń aıtýynsha, kadr daıarlaý sapasy kolledjderdiń materıaldyq-tehnıkalyq bazasyna tikeleı baılanysty.
— Qazirdiń ózinde jergilikti atqarýshy organdar men jumys berýshilerdiń qarajaty esebinen 174 kolledj jabdyqtaldy. Budan bólek, jer qoınaýyn paıdalanýshylar qoldaýymen taǵy 13 kolledjdiń materıaldyq bazasy jańartyldy, — dedi J. Súleımenova.
Soǵan qaramastan, 143 memlekettik kolledjdiń materıaldyq-tehnıkalyq bazasyn jańartý qajet etedi. Atap aıtqanda, 72 kolledj nemese 17 paıyzy kúrdeli jóndeýdi qajet etedi. 107 kolledjde — jabdyqtarǵa qajettilik joǵary bolsa, 202 kolledjde — bul kórsetkish ortasha deńgeıde.
Kúrdeli jóndeýdi qajet etetin kolledjderdiń eń kóbi Batys Qazaqstan oblysynda — 11. Almaty jáne Jetisý oblystarynda — 7, Ulytaý jáne Soltústik Qazaqstan oblystarynda — 6 kolledjge kúrdeli jóndeý qajet. Máseleni júıeli sheshý úshin jan basyna shaqqandaǵy normatıvtik qarjylandyrýǵa amortızatsııalyq shyǵyndardy engizý josparlanyp otyr.
— Eldegi 11 óńirde 20 myń orynǵa arnalǵan 13 zamanaýı kolledj salý josparlanýda. Bul óńirlerdegi tapshylyqty azaıtyp, jastardy zamanaýı, jabdyqtalǵan ortada sapaly kásiptik bilimmen qamtamasyz etýge múmkindik beredi, — dedi Oqý-aǵartý mınıstri.
Sonymen qatar kolledjderdi jabdyqtaýǵa jeke ınvestıtsııalar tartylyp, iri kásiporyndardyń qamqorlyǵyndaǵy memlekettik kolledjderdi nysanaly túrde jańartý jumystary júrgiziledi.
Buǵan deıin J. Súleımenova Qazaqstan kolledjderinen 32 mamandyq alynyp tastalýy múmkin ekenin aıtqan edi.
Olardyń ornyna 20 jańa mamandyq paıda bolady.
Al 2035 jyly 1,8 mln jumysshy mamanǵa suranys bolady.
