Qazaqstannyń 10 oblysynda qar jaýyp, kóktaıǵaq bolady
ASTANA. KAZINFORM – Qazaqstannyń 10 oblysynda túngi jáne tańerteńgi ýaqytta qar aralas jańbyr jaýyp, kóktaıǵaq bolýy múmkin, dep habarlaıdy Kazinform «QazAvtoJol» ulttyq kompanııasynyń eskertýine silteme jasap.
Sınoptıkterdiń boljamynsha, Aqmola, Abaı, Aqtóbe, Pavlodar, Qaraǵandy, Qyzylorda, Mańǵystaý, Ulytaý, Soltústik Qazaqstan jáne Shyǵys Qazaqstan oblystarynda qar aralas jańbyr men qar jaýady. Keıbir aýdandarda kóktaıǵaq kútiledi.
Osyǵan baılanysty jol qyzmeti júrgizýshilerdi saqtyq sharalaryn kúsheıtýge shaqyrdy.
– Júrgizýshilerden jolda asa muqııat bolýdy, jyldamdyq rejımi men araqashyqtyqty qatań saqtaýdy, qozǵalys baǵytyn aldyn ala josparlaýdy jáne asa qajettilik bolmasa saparǵa shyqpaýdy suraımyz. Dóńgelekterdiń jaı-kúıine erekshe kóńil bólgen jón. Eger kólikte áli jazǵy shına turǵan bolsa, kóktaıǵaqta basqarý qıyndap, jol-kólik oqıǵalarynyń oryn alý qaýpi edáýir artady, – delingen eskertýde.
Ulttyq kompanııa jol qyzmetteriniń táýlik boıy jumys isteıtinin málimdedi.
Júrgizýshiler respýblıkalyq mańyzy bar joldardyń jaı-kúıi men aýa raıy týraly ózekti aqparatty 1403 baılanys ortalyǵyna habarlasyp bile alady.
Aıta keteıik, buǵan deıin Qazaqstannyń eki óńirinde jazǵy dóńgelekpen jolǵa shyqqan kólikterge shekteý qoıylǵan bolatyn. Sondaı-aq «QazAvtoJol» júrgizýshilerdi qysqy maýsymǵa daıyndalyp, kóktaıǵaq kezinde qaýipsizdik sharalaryn saqtaýǵa shaqyrǵan edi.
