Qazaqstannan jylda 16 mlrd dollar zańsyz shyǵarylady - senator
ASTANA. KAZINFORM - Senattyń Qarjy jáne bıýdjet komıtetiniń depýtattary «Kapıtaldy zańsyz áketýdiń aldyn alý maqsatynda valıýtalyq retteýdi júzege asyrý» taqyrybyna arnalǵan dóńgelek ústel otyrysyn ótkizdi.
«Qazaqstannan jyl saıyn shamamen 16,7 mlrd dollar zańsyz shyǵarylady. 148 eldiń reıtınginde bizdiń elimiz 11-shi orynda tur. Qazaqstan ekonomıkasynyń shıkizattyq baǵyty bar ekenin bárimiz bilemiz. Qazaqstan kómirsýtegi men metaldardyń eksportyna óte táýeldi bolyp otyr. ıAǵnı, bizdiń eksportymyzdyń negizi – jer qoınaýynan alynǵan qazbalar, ol túpkilikti ónim emes. Tıisinshe, paıdaly qazbalardy eksporttaý esebinen tikeleı nemese janama túrde alynǵan kapıtaldy shetelge zańsyz shyǵarý derekteri qoǵamǵa óte aýyr tıedi jáne muqııat baqylaýda bolady. Osylaısha, bul problema ekonomıka aıasynan shyǵyp, áleýmettik jáne saıası sıpatqa ıe bolady», - dedi Senattyń Qarjy jáne bıýdjet komıtetiniń tóraǵasy Sultanbek Mákejanov.
Senator Memleket basshysynyń tapsyrmasy boıynsha shetelge zańsyz qarjy shyǵarý problemasyna erekshe nazar aýdarylyp otyrǵanyn atap ótti. Bul máseleni sheshý úshin arnaıy mekemearalyq komıssııa qurylǵan bolatyn. Sonymen qatar, tıisti zańnamalyq ózgerister qabyldandy, onyń ishinde valıýtalyq retteý jóninde de ózgerister bar.