Qazaqstannan jer alamyn dep kezekte turǵan sheteldik joq - G.Qaraǵusova
«Bul máseleniń negizgi jaýabyn Qazaqstan halqy Assambleıasynyń sessııasy barysynda Memleket basshysy naqty berip, Qazaqstanda sheteldikterge jer satylmaıtyndyǵyn aıtqan bolatyn. Buǵan qosa, jer satyp alǵysy kelip kezekte turǵan, óz tehnologııasyn ákelýge nıetti sheteldikter jaıynda estip te, kórip te otyrǵan joqpyz», - dedi ol BAQ ókilderiniń saýalyna oraı.
Onyń atap ótýinshe, 2013 jyly Úkimet «Investıtsııalar týraly» Zańǵa qol qoıdy. Sonyń nátıjesinde ınvestorlarǵa 10 jylǵa deıin barlyq salyqtardan bosatylý syndy biregeı múmkinshilik berildi.
"Ókinishke oraı, ınvestorlardan eshkim de kelmedi. Endi mine sheteldikterge jer beriletin bolypty deýde".
G.Qaraǵusova Qazaqstanda sheteldikterge jerdi jalǵa berý tájirıbesi 2003 jyldan beri bar ekendigin atap ótti. Degenmen, ol ýaqytta jer jalǵa 10 jylǵa berilip kelgen bolatyn. Alaıda bul merzim sheteldik ınvestorlardyń jerge salǵan óz qarjysyn qaıtaryp alýǵa jáne azdap bolsyn paıda tabýyna múmkindik bermeıdi.
«Sondyqtan da halyqaralyq tájirıbege súıene otyryp bul merzim uzartyldy. Shyndyǵy osy, osylaı durystap túsindire alsaq, barlyǵy da túsinedi. Bizderge memlekette júrgizilip jatqan kez kelgen máseleni túsindirý jumystaryn kúsheıtý qajet», - dep atap ótti ol.
