Qazaqstannan janarmaıdy zańsyz shyǵarýdyń 392 deregi anyqtaldy
ASTANA. KAZINFORM — Qazaqstanda memlekettik shekara arqyly munaı ónimderiniń tasymaldanýyna baqylaý kúsheıdi. Memlekettik kirister komıteti zańsyz áketilgen 16 myń lıtrden astam janar-jaǵarmaı materıalyn anyqtady.
Memlekettik kirister komıtetiniń málimetinshe, tekserý jumystary avtomobıl ótkizý beketterinde ǵana emes, shekara mańyndaǵy aýmaqtarda mobıldi toptardyń kómegimen de júrgizilip jatyr. Sonymen qatar janarmaı quıý beketterindegi otyn satý kólemi men shaǵyn munaı óńdeý zaýyttarynyń jumysyna kúndelikti monıtorıng jasalady.
Baqylaý kúsheıtilgen ýaqyttan beri mobıldi toptar 122 avtotsısternany teksergen. Keı jaǵdaılarda otynnan saraptama jasaý úshin synamalar alynǵan.
— Nátıjesinde janar-jaǵarmaıdy zańsyz áketýdiń 392 faktisi tirkelip, jalpy kólemi 16 myń lıtrden asatyn otyn shyǵarýǵa tosqaýyl qoıylǵan. Kóbine zań buzýshylar janarmaıdy arnaıy jabdyqtalǵan qosymsha baktarǵa nemese kanıstrlerge quıyp tasymaldaýǵa tyrysqan, — dep habarlady vedomstvo.
Máselen, 6 shildede Batys Qazaqstan oblysyndaǵy «Syrym» ótkizý pýnktinde júk kóliginiń qosymsha bagyna jasyrylǵan 1,2 myń lıtr dızel otynyn elden shyǵarýǵa áreket jasalǵan. Al 8 shildede Pavlodar oblysynyń Jelezın aýdanynda qujatsyz 4 myń lıtrden astam benzın tasymaldaǵan kólik ustaldy.
Budan bólek, Memlekettik kirister komıtetiniń tóraǵasy Jandos Dúısembıev Qazaqstan–Ózbekstan shekarasyndaǵy baqylaý jumystarynyń uıymdastyrylýyn tekserip, sharalardy kúsheıtý boıynsha tapsyrmalar bergen.
Komıtet málimetinshe, shekara mańyndaǵy janarmaı quıý stantsııalary men shaǵyn munaı óńdeý zaýyttaryna júrgizilgen taldaý nátıjesinde 103 hronometrajdyq zertteý taǵaıyndalǵan.
Eske salaıyq, buǵan deıin Qazaqstannan janarmaı shyǵarýǵa tyıym taǵy jarty jylǵa uzartylýy múmkin ekenin jazǵan edik.
