Qazaqstannan janarmaı shyǵarýǵa tyıym taǵy jarty jylǵa uzartylýy múmkin
ASTANA. KAZINFORM — QR Energetıka mınıstrligi «QR aýmaǵynan munaı ónimderin áketýdiń keıbir máseleleri týraly» buıryq jobasyn ázirledi.
Qujat munaı ónimderiniń jekelegen túrlerin elden shyǵarýǵa tyıym merzimin uzartýdy qarastyrady.
— Joba buıryqpen QR aýmaǵynan munaı ónimderiniń jekelegen túrlerin áketýge qoldanystaǵy tyıym salýdy uzartý kózdeledi. 2025 jylǵy 22 qarashadan 2026 jylǵy 22 mamyrǵa deıingi kezeńde Eýrazııalyq ekonomıkalyq odaqqa múshe memleketterdi qosa alǵanda, avtomobıl jáne temirjol kóligimen benzınderdi, dızel otynyn jáne jekelegen munaı ónimderin áketýge tyıym salynady. 2027 jylǵy 1 qańtardan bastap 2027 jylǵy 30 maýsymǵa deıingi kezeńde Eýrazııalyq ekonomıkalyq odaqtyń kedendik aýmaǵynan tys jerlerge jeńil dıstıllıattardy, avıatsııalyq kerosındi, dızel otynyn, gazoılderdi, tolýoldy, ksıloldy jáne munaı bıtýmyn áketýge tyıym engiziledi. Tyıymdar alty aı merzimge engiziledi jáne QR Úkimetiniń sheshimi boıynsha júzege asyrylatyn gýmanıtarlyq kómekti jáne ózge de erekshelikterdi kózdeıdi, — delingen buıryq jobasynda.
Endi munaı ónimderiniń jekelegen túrlerin áketýge tyıym uzartylmaq.
— 2026 jylǵy 22 qarashadan 2027 jylǵy 22 mamyrǵa deıin alty aı merzimge QR aýmaǵynan avtomobıl jáne temirjol kóligimen, onyń ishinde Eýrazııalyq ekonomıkalyq odaqqa múshe memleketterge munaı ónimderiniń jekelegen túrlerin áketýge, sondaı-aq 2027 jylǵy 1 qańtardan 2027 jylǵy 30 maýsymǵa deıin QR aýmaǵynan Eýrazııalyq ekonomıkalyq odaqtyń kedendik aýmaǵynan tys jerlerge áketýge tyıym engiziledi, — delingen qujatta.
Jobanyń maqsaty — ulttyq qaýipsizdikti jáne munaı ónimderiniń ishki naryǵynyń qajettilikterin qamtamasyz etý. Ony qabyldaý teris qoǵamdyq-ekonomıkalyq, quqyqtyq jáne ózge de saldarǵa ákep soqpaıdy.
Buıryq jobasy qoǵamdyq talqylaý úshin 21 shildege deıin Ashyq NQA portalyna júkteldi.
Aıta keteıik, buǵan deıin Qazaqstanda janarmaı baǵasyna monıtorıng kúsheıetinin jazǵanbyz.
