Qazaqstannan zańsyz ýyldyryq tasymaldaǵan reseılikke mıllıon teńge aıyppul salyndy
ASTANA. QazAqparat - Reseı azamatyna bekire tuqymdas balyǵynyń ýyldyryǵyn zańsyz tasymaldaǵany úshin aıyppul salyndy, dep habarlaıdy «QazAqparat» HAA tilshisi Atyraý oblystyq sotynyń saıtyna silteme jasap.
«Atyraý oblysynyń Qurmanǵazy aýdandyq sotynda Qazaqstan Respýblıkasynyń QK-niń 339-babymen Reseı Federatsııasynyń azamaty sottalýshy M.V.-ǵa qatysty qylmystyq is qaraldy. Sotqa deıingi tergep-tekserý barysynda prokýror men sottalýshy arasynda kináni moıyndaý týraly protsestik kelisim jasalǵan, - delingen Atyraý oblysy Qurmanǵazy aýdandyq sotynyń habarlamasynda.
Reseı Federatsııasynyń azamaty 2017 jyldyń 2 qazanynda taksımen Astrahan qalasynan Atyraýǵa kelip, «Kóktem» bazaryndaǵy júrgizýshi arqyly tanymaıtyn adamnan jalpy salmaǵy 5,420 keli bekire tuqymdas balyqtyń ýyldyryǵyn eshqandaı qujatsyz 128 myń Reseı rýbline satyp alǵan. Satyp alǵannan keıin ol taksı kóligimen Astrahan qalasyna bet alǵan. Ony Kotıaevka aýylyndaǵy «Qurmanǵazy» ShBB qyzmetkerleri ustap, eshqandaı qujaty joq bekire tuqymdas balyǵynyń ýyldyryǵy salynǵan 12 plastıkalyq ydysty tárkiledi.
Sot úkimimen sottalýshyǵa 500 EAK mólsherinde 1 134 500 teńge aıyppul salý jazasy taǵaıyndaldy.
Sot úkimi zańdy kúshine engen joq.
