Qazaqstannan zańsyz munaı eksporttaǵan qylmystyq toptyń isi sotqa jiberildi
«Qazaqstan Respýblıkasynyń Ulttyq qaýipsizdik komıteti men sybaılas jemqorlyqqa qarsy is-qımyl qyzmetiniń vedomstvoaralyq jedel tergeý toby QR aýmaǵynan tysta «Oil Blend» munaı ónimderiniń qospasy túrindegi munaıdy zańsyz eksporttady degen kúdikpen QR azamaty A. Qojaǵalıev, Belarýs Respýblıkasynyń azamaty S.Kýntsevıch, Qyrǵyz Respýblıkasynyń azamaty E. Mamanov, taǵy basqa kúdiktilerge qatysty sotqa deıingi tergeý amaldaryn aıaqtady», - delingen habarlamada.
Aıyptalýshylardyń áreketteri QR Qylmystyq kodeksiniń «Munaıdyń jáne munaı ónimderiniń shyǵarylý zańdylyǵyn rastaıtyn qujattarsyz olardy tasymaldaý, ıemdený, ótkizý, saqtaý, sondaı-aq munaıdy qaıta óńdeý» dep atalatyn 197-baby, «Transulttyq uıymdasqan top, transulttyq qylmystyq uıym qurý jáne olarǵa basshylyq etý, sol sııaqty olarǵa qatysý» dep atalatyn 264-baby, taǵy basqa da aýyr jáne erekshe aýyr quqyqbuzýshylyqtar sanatyna jatatyn baptar boıynsha qaralyp jatyr.
Qazirgi kezde A. Qojaǵalıev, A. Kóshkinbaev, E. Ýtenııazov, S.Kýntsevıch jáne E. Mamanovtarǵa qatysty sotqa deıingi tergep-tekserý materıaldary aıyptaý aktisimen jáne dáleldemelermen birge Aqtóbe oblysynyń qylmystyq ister jónindegi mamandandyrylǵan aýdanaralyq sotyna qabyldanǵan.
Eske sala keteıik, 2016 jyldyń jeltoqsanynda QR UQK, QR Sybaılas jemqorlyqqa qarsy is-qımyl ulttyq bıýrosy jáne QR ІІM qyzmetiniń vedomstvoaralyq jedel tergeý toby Aqtóbe oblysynyń aýmaǵynda munaı jáne munaı ónimderin zańsyz aınaldyrýǵa qatysy bar qylmystyq top qyzmetiniń jolyn kesken bolatyn.
