Qazaqstannan ıadrolyq materıaldardyń qoldy bolyp ketýi esh múmkin emes - B. Jaqsalıev

ASTANA. QazAqparat - Qazaqstannan ıadrolyq materıaldardyń qoldy bolyp ketýi esh múmkin emes. Búgin Ortalyq kommýnıkatsııalar qyzmetindegi brıfıng barysynda QR Energetıka vıtse-mınıstri Baqytjan Jaqsalıev osylaı málim etti.

Toqtala ketetin jaıt, ótken aptada TMD Terrorızmge qarsy ortalyq basshysy Andreı Novıkov Qazaqstannyń ıadrolyq zattardy qamtamasyz etýine baılanysty senimsizdik bildiretindeı málimdeme jasaǵan edi. Osyǵan baılanysty jýrnalıster saýalyna vıtse-mınıstr atalǵan málimdemeni «negizsiz, faktisi de joq» dep jaýap berdi.

«Birden aıtaıyq, biz bul úderiske belsendi túrde qatysyp kelemiz. Memlekettik organ retinde bizdiń mınıstrliktiń osy máselege qatysy bar. Buǵan deıin qabyldanǵan ıadrolyq materıaldardy qadaǵalaý boıynsha Úkimet sheshimderi qabyldanǵan. Bizdiń sharalarymyzdyń bári transparentti, Qazaqstan halyqaralyq mindettemelerdi tolyq oryndap otyr. Eń bastysy eshqandaı da ıadrolyq materıaldardyń qoldy bolyp ketýi múmkin emes», - dedi B. Jaqsalıev.

Budan bólek, vıtse-mınıstr Mańǵystaý oblysyndaǵy oryn alǵan radıoaktıvti tsezıı konteıneriniń joǵalýymen baılanysty oqıǵaǵa da toqtalyp ótti. «Másele, osy fakti tóńireginde bolsa, onda bul oqıǵaǵa qatysty arnaıy komıssııa jumys istep jatyr. Shyndyǵynda, bul adam nanǵysyz oqıǵa, taza nemquraılylyq. Alaıda, bul baqylaýdyń nasharlyǵyn bildirmeıdi», - dedi B. Jaqsalıev.