Qazaqstannan Vetnam men Pákistanǵa áýe reısi ashylady
Indýstrııa jáne ınfraqurylymdyq damý mınıstrligi kólik komıteti tóraǵasynyń orynbasary Qasym Tilepov Kazakhstan Global Investment Roundtable-2022 atty jahandyq ınvestıtsııa jónindegi dóńgelek ústeldiń jalpy otyrysynda osyndaı málimet aıtty.
«Azamattyq avıatsııa salasynda COVID-19 pandemııasynan keıin qaıta qalypqa oralý protsesi baıqalýda. Halyqaralyq áýe tasymaly keńeıip, aptasyna 490 reıs jıiligimen 28 elge 112 baǵytqa jetti», - degen komıtet ókili olardyń negizgilerine toqtaldy.
Aıtýynsha, 2021 jyly mynandaı marshrýttar ashylǵan:
Katar baǵytynda: Almaty-Doha.
Kýveıt baǵytynda: Almaty-El-Kýveıt.
BAÁ baǵytynda: Ábý-Dabı – Almaty.
Maldıv araldary baǵytynda: Almaty-Male.
Shrı – Lanka baǵytynda: Almaty-Kolombo.
«2022 jyly Italııamen Almaty – Mılan baǵyty, Grekııamen Almaty – Iraklıon baǵyty ashyldy. Astana, Aqtaý jáne Shymkent qalalarynan Ankaraǵa reıster ashylady dep kútilýde. Almaty men Astanadan Nıachang qalasyna (Vetnam) ashylady. Taılandqa, Mońǵolııaǵa jáne Túrikmenstanǵa reısterdi qalpyna keltirý josparlanyp otyr. Pákistanmen áýe qatynasyn ashyp, Qytaımen, Úndistanmen, Ulybrıtanııamen, Saýd Arabııasymen jáne Ózbekstanmen áýe qatynasyn ulǵaıtý kózdelgen», - dedi Qasym Tilepov.
Uıymdastyrýshylardyń sózine qaraǵanda, sharaǵa jetekshi halyqaralyq kompanııalar men qazaqstandyq bıznestiń 500-den astam ókili, ınvestorlar, bedeldi sarapshylar shaqyrylǵan.
