Qazaqstannan úırenýge bolady – TMD PAA baıqaýshylary referendýmnyń uıymdastyrylýy týraly

ASTANA.KAZINFORM - Halyqaralyq baıqaýshylarǵa qolǵabys kórsetý ortalyǵynda ótken baspasóz konferentsııasynda TMD Parlamentaralyq assambleıasynyń baıqaýshylary óz pikirlerin bildirdi.

Reseı Federatsııasy Federaldy Jınalysy Federatsııa Keńesiniń Federaldyq qurylym, aımaqtyq saıasat, jergilikti ózin-ózi basqarý jáne soltústik ister jónindegi komıtetiniń tóraǵasy Andreı Shevchenko kez kelgen memleket úshin jańa Konstıtýtsııa qabyldaý el ómirindegi eń mańyzdy oqıǵa ekenin aıtty. Sonymen qatar ol daıyndyq deńgeıiniń joǵary ekenin erekshe atap ótti.

-Komıssııalardyń da, saılaý ýchaskeleriniń de qanshalyqty jaqsy daıyndalǵany kórinip tur. Ýchaskelerde ornalasqan barlyq aqparattyq materıaldar óte mazmundy ári túsinikti daıyndalǵan. Sondaı-aq múgedektigi bar azamattarǵa arnalǵan arnaıy daýys berý oryndarynyń bar ekenin baıqadyq. Bul da óte mańyzdy. Búgin bizde áli de saılaý ýchaskelerin aralap, baqylaý júrgizýge múmkindik bolady dep oılaımyn. Shynynda da, úırenetin tustar bar. Máselen, osyndaı sharany uıymdastyrý. Bári joǵary deńgeıde dep oılaımyn, – dedi spıker.

Óz kezeginde Reseı Federatsııasy Federaldy Jınalysy Memlekettik Dýmasynyń TMD isteri, eýrazııalyq ıntegratsııa jáne otandastarmen qarym-qatynas jónindegi komıteti tóraǵasynyń birinshi orynbasary Kazbek Taısaev Qazaqstannyń saılaýdy ótkize alatynyn aıtty.

-Ásirese kózge túskeni – komıssııa músheleriniń daıyndyǵy, olardyń joǵary kásibı deńgeıi. Kelisemin, sizderden úırenetin nárse bar, – dedi spıker.

Osyǵan deıin Ózbekstannyń OSK tóraǵasy referendým Qazaqstan úshin jańa tarıhı kezeńdi ashatyny týraly aıtqan bolatyn.