Qazaqstannan tysqary jerlerde qosymsha 21 saılaý ýchaskesi ashylady - QR SІM
ASTANA. 12 jeltoqsan. QazAqparat /Marlan Jıembaı/ - Qazaqstannan tysqary jerlerde qosymsha 21 saılaý ýchaskesi ashylady. Bul týraly búgin aptalyq brıfıngte QR Syrtqy ister mınıstrliginiń resmı ókili Altaı Abıbýllaev málim etti.
Elimizdiń syrtqy saıasat vedomstvosynyń Qazaqstan azamattarynyń saılaýǵa qatysý quqyǵyn qamtamasyz etý baǵytyndaǵy jumystaryna toqtalǵan ol: «QR Syrtqy ister mınıstrligi Ortalyq saılaý komıssııasymen jáne Astana qalasynyń ákimdigimen birge elimizden tysqary memleketterde qosymsha 21 saılaý ýchaskesin ashý týraly sheshim qabyldady. Osy ýaqytqa deıin saılaý 35 ýchaskede ótetin. Olardyń jalpy sany 56-ǵa jetti», dedi ol.
Onyń atap ótýinshe, atalǵan sharalardyń basty maqsaty Qazaqstan aýmaǵynan tysqary jerde ýaqytsha nemese issaparda júrgen el azamattarynyń Konstıtýtsııalyq quqyǵyn tolyǵymen qamtamasyz etý bolyp tabylady.
«Syrtqy ister mınıstrligi 15 qańtarda ótetin saılaýdy shet memleketterde óte sapaly jáne joǵary deńgeıde ótkizý jóninde Qazaqstannyń barlyq syrtqy dıplomatııalyq ókildikteriniń basshylaryna tıisinshe tapsyrma bergen bolatyn», dedi A.Abıbýllaev.
