Qazaqstannan Túrikmenstanǵa brýtsellez et jetkizilgeni – feık

ASTANA. KAZINFORM – BAQ-ta elimizden Túrikmenstanǵa brýtsellezi bar et jetkizildi degen jalǵan aqparat tarap jatyr. Bul týraly Aýyl sharýashylyǵy mınıstrligi Veterınarııalyq baqylaý jáne qadaǵalaý komıtetiniń baspasóz qyzmeti habarlaıdy.

- Aqmola oblysynan Túrikmenstanǵa brýtsellezge shaldyqqan et jetkizildi degen aqparat shyndyqqa sáıkes kelmeıdi, - degen habar aldyq vedomstvodan. 

Resmı aqparatta aıtylǵandaı, bıyldyqqa Qazaqstannan Túrikmenstanǵa et jetkizilgen joq. 

- Buqaralyq aqparat quraldaryn materıal daıyndaý barysynda ýákiletti memlekettik organdardyń tek resmı derekti paıdalanýǵa shaqyramyz,- dep habarlaıdy AShM. 

Aıta keteıik, elimiz sıyr, qoı etin jáne tiri maldy Iordanııaǵa eksporttaıtyn boldy.

Sondaı-aq bıyl shildede elordada juqpaly aýrýǵa shaldyqqan maldyń eti satylyp jatqany jaıly aqparat taraǵan edi.