Qazaqstannan tórt boksshy World Boxing álemdik reıtınginde kósh bastady

ASTANA. KAZINFORM — Halyqaralyq boks federatsııasy (World Boxing) kúzgi iri halyqaralyq týrnırler serııasynyń qorytyndysy boıynsha álemdegi eń myqty boksshylardyń jańartylǵan reıtıngin jarııalady.

Boksshy Aıbek Oralbaı Azııa oıyndarynyń jartylaı fınalyna ótti
Foto: QR UOK

Qazaqstan quramasy álemdik áýesqoı boksta úzdikter qataryndaǵy mártebesin saqtap qaldy: tórt otandyq sportshy óz salmaq dárejesinde birinshi oryndy ıelenip otyr, al taǵy tórteýi ekinshi orynda.

Jańa reıtıngide tórt otandasymyz óz salmaq dárejelerinde kósh bastap tur. Olar: Sanjar Táshkenbaı (50 keli), Tórehan Sabyrhan (70 keli), Natalıa Bogdanova (70 keli) jáne aýyr salmaqtaǵy Aıbek Oralbaı (90 keliden joǵary).

Sonymen qatar Mahmud Sabyrhan (55 keli), Nazym Qyzaıbaı (48 keli) jáne Aıda Ábikeeva (65 keli) ekinshi orynǵa jaıǵasty. Jazǵy Azııa oıyndarynyń qola júldegeri Alýa Balqybekova (51 keli) bir saty joǵarylap, reıtınginiń ekinshi satysyna shyqty.

Dına Islambekova (80 keliden joǵary) men Nurbek Oralbaı (85 keli) úzdik úshtikti túıindep otyr.

Federatsııanyń málimeti boıynsha, Qazaqstan men Ózbekstan erler arasyndaǵy salmaq dárejesindegi alǵashqy on orynnyń segizinde kósh bastaǵan.

Qazirgi reıtıng uıym tarıhyndaǵy altynshy bolyp esepteledi jáne boksshylardyń eki jyldyq tsıkldegi — 2024 jyldyń qarashasynan 2026 jyldyń qazanyna deıingi, sonyń ishinde Azııa oıyndary, Sofııadaǵy Eýropa chempıonaty jáne Pýebladaǵy Pan-Amerıka chempıonatyndaǵy nátıjelerin qamtıdy. Jańartylǵan reıtıngiler aldaǵy aptalarda tikeleı praktıkalyq mańyzǵa ıe bolady.

Sonymen qatar 26 qarasha men 4 jeltoqsan aralyǵynda Tashkentte ótetin bokstan álem kýbogynyń fınalyna qatysýshylardy irikteý úshin paıdalanylady.

Aıta keteıik, Aıbar Qaıym semserlesýden jasóspirimder Olımpıadasynyń shırek fınalyna shyqty.