Qazaqstannan Tokıoǵa áýe reısi qashan ashylady
ASTANA. KAZINFORM — Búgin Úkimet otyrysynda Premer-mınıstr Oljas Bektenov Qazaqstannan tikeleı jóneltiletin halyqaralyq reısterdi kóbeıtýdi tapsyrdy.
— Tokıo jáne basqa da baǵyttar boıynsha tikeleı reıster ashylatyny kópten beri aıtylyp keledi, biraq áli de nátıje joq… Josparlanǵan reıster tek sóz júzinde qalyp qoımasyn, — dedi Úkimet basshysy.
Kólik mınıstri Nurlan Saýranbaev halyqaralyq reıster josparǵa sáıkes iske qosylatynyn ýáde etti.
— Tokıo boıynsha osy jyldyń tórtinshi toqsanynda, al AQSh-qa keler jyldyń ekinshi toqsanynda reısterdi ashamyz. Qazir 34 halyqaralyq baǵdar boıynsha Astanada reıster oryndalyp jatyr. Osy jyldyń sońyna deıin taǵy da 5 baǵytty ashamyz, — dedi mınıstr.
Buǵan deıin Tokıo, Sıngapýr, Nıý-Iorkke Qazaqstannan áýe reısteri ashylatynyn jazǵan edik.
