Qazaqstannan tazyny basqa elge shyǵarýǵa tolyq tyıym salynýy múmkin
ASTANA. KAZINFORM – Senator Bıbigúl Jeksenbaı óziniń depýtattyq saýalynda qazaq tazysyn saqtaý jáne qorǵaý máselesin kóterdi.
- Qazaqtyń qumaı tazysy mádenı muranyń bir bóligi ǵana emes, sonymen birge ulttyq biregeıliktiń mańyzdy sımvoly. Tazy tuqymnyń tazalyǵyn saqtaý jáne onyń shetelge baqylaýsyz shyǵarylýyn boldyrmaý úshin qosymsha tıisti ózgerister qajet ekenin mamandar kóterip otyr. Kóptegen elder biregeı ıt tuqymdaryn qorǵaý úshin memlekettik deńgeıdegi is-sharalardy qarastyrǵan. Máselen, Japonııada akıta-ınýdy, Túrkııada kangaldy, Túrikmenstanda alabaıdy syrtqa áketýge tyıym salynǵan. Qazaqstanda da bul jaǵdaıda qatań sharlardy qolǵa alǵan jón. Qumaıdy eksporttaýǵa tolyq tyıym salý nemese tıisti memlekettik organdardan arnaıy ruqsat alýyn mindetteý mańyzdy, - dedi B. Jeksenbaı Úkimet basshysynyń atyna joldaǵan saýalynda.
Onyń aıtýynsha, tazynyń genofondyn qorǵaý jáne basqa ıt tuqymdarymen býdandastyrýǵa jol bermeý úshin shuǵyl sharalar qajet.
- Ulttyq kınologtar qaýymdastyǵy ókilderiniń pikirinshe, elimizde tazy men tóbet kúni dep belgilengen 3 qyrkúıek tarıhı ári mádenı dástúrge sáıkes kelmeıdi. Dástúr boıynsha Qazaqstan ań aýlaý maýsymy qarasha aıynda alǵash qar túskende – qansonarda bastalady. Tazy men tóbet kúnin osy kezeńge oraılastyryp, qarashanyń birinshi jeksenbisine belgileýdi qarastyrǵan jón. Bul óz kezeginde merekeniń ańshylyq ári saıatshylyq dástúrlerimen baılanysyn kúsheıtedi. Osy oraıda tazy men tóbet kúnin dástúrli ańshylyq maýsymynyń resmı ashylýymen baılanystyra otyryp, qarashanyń birinshi aptasyna aýystyrýdy qarastyrý usynylady, - dedi depýtat.
Senatordyń sózine qaraǵanda, álemdik deńgeıde qazaq tazysyn brend retinde nasıhattaý baǵytynda dástúrli Qansonarda arnaıy halyqaralyq festıvalin ótkizip turý, Muhtar Maǵaýınniń «Tazynyń ólimi» shyǵarmasy negizinde kórkem fılm túsirýdi qarastyrǵan jón.
Eske salsaq, elimizde tazy jáne tóbet kúnin merekeleý usynyldy. Bul týraly «Ashyq NQA» portalynda buıryq jarııalandy.
Ekologııa jáne tabıǵı resýrstar mınıstrligi Qazaqstan Respýblıkasyndaǵy merekelik kúnderdiń tizbesin bekitý týraly» Qazaqstan Respýblıkasy Úkimetiniń 2017 jylǵy 31 qazandaǵy №689 qaýlysyna tolyqtyrý engizdi.