Qazaqstannan suıytylǵan gazdy shyǵarýǵa tyıym salý týraly buıryqqa ózgeris engizilmek

ASTANA. QazAqparat - «Suıytylǵan munaı gazyn tasymaldaýdyń keıbir máseleleri týraly» Energetıka mınıstriniń buıryǵyna ózgerister engiziledi. Bul jaıynda «Ashyq» NQA portalynda jarııalanǵan, dep habarlaıdy QazAqparat tilshisi.

Buıryq jobasynda Qazaqstan Respýblıkasynyń aýmaǵynan suıytylǵan munaı gazyn, propandy jáne býtandy avtomobıl kóligimen úsh jylǵa, temir jol kóligimen alty aı merzimge áketýge tyıym salý eskerilgen. Biraq Salyq kodeksi 722-babynyń 1-tarmaǵyna sáıkes salyq rejıminiń turaqtylyǵyn eskere otyryp, jer qoınaýyn paıdalaný kelisimsharty aıasynda otyndy óndirýdi júzege asyrǵan jer qoınaýyn paıdalanýshylardyń suıytylǵan munaı gazyn áketýine shekteý bolmaıdy.

Qoldanystaǵy buıryqta suıytylǵan munaı gazyn Almaty oblysy boıynsha Memlekettik kirister departamenti «Dostyq» kedeniniń «Alakól» beketi, sondaı-aq Qazaqstan Respýblıkasynan tys jerlerde bastalatyn jáne aıaqtalatyn orny aýystyrylatyn tranzıttik tasymaldar arqyly áketýdi qospaǵanda, Qazaqstan aýmaǵynan suıytylǵan munaı gazyn avtomobıl kóligimen tysymaldaýǵa tyıym salynǵan.

Osy buıryq alǵashqy resmı jarııalanǵannankeıin kúntizbelik on kún ótken soń qoldanysqa engiziledi.

Bul qujat elimizdiń ishki naryǵyn suıytylǵan gazben tolyqtaı qamtamasyz etý maqsatynda ázirlendi.