Qazaqstannan sút ımportynyń údeýi Reseıdi «qorqyta» bastady - R.Oshaqbaev

ASTANA. QazAqparat - Qazaqstannan sút ımportynyń údeýi Reseıdi «qorqyta» bastady, osyǵan oraı kórshilester negizsiz shekteý engizýi múmkin. Búgin Májiliste Ekonomıkalyq reformalar jáne óńirlik damý komıtetiniń keńeıtilgen otyrysynda Ulttyq kásipkerler palatasy tóraǵasynyń orynbasary Raqym Oshaqbaev osylaı málim etti.

Eske salaıyq, jıyn barysynda tutynýshy ónimderin tehnıkalyq retteý máseleleri talqylanǵan bolatyn.

«Tehnıkalyq retteýge jatatyn máseleler búgingi kúni Keden odaǵy aıasynda da ózekti bola tústi. Birinshi kezekte bizdiń Odaq aıasyndaǵy áriptesterimiz taýarlardyń rynokqa enýine qarsy tarıftik emes shekteýlerdi engizip jatyr. Biz qazir «Rosselhoznadzor» tarapynan Qazaqstannan keletin sútterge qatysty qyzý talqylaý júrgizilip jatqanyn bilemiz. Rasynda, bizdiń reseılik áriptesterimizdi qazaqstandyq sút ımporty «qorqytyp» jatyr. Soǵan oraı, olardyń tarapynan Qazaqstannan sút jetkizýge negizsiz shekteýler qoıylýy múmkin dep oılap otyrmyz», - dedi R.Oshaqbaev.

Toqtala ketetin jaıt, ótken joly ǵana Reseı Qazaqstannyń eki kompanııasyna et ákelýge tyıym salǵan.

«Rasynda da bul Reseı óz aýmaǵynan azyq-túlik taýarlarynyń tranzıtin tikeleı nemese janama túrde shekteı beretinin bildiredi. Endeshe bul másele shyndyǵynda da quqyqtyq baǵalaýǵa alynyp, ýákiletti organdar tarapynan qandaı da jaýapty qadamdar jasalýy shart», - dedi UKP ókili.