Qazaqstannan shetelge aqsha aýdarý operatsııalary kúrt artty

NUR-SULTAN. QazAqparat – Qazaqstannan shetelge aqsha aýdarymdarynyń kólemi kúrt ósti. Mundaı málimetti QR Qarjy mınıstrligi Memlekettik kirister komıtetiniń tóraǵasy Marat Sultanǵazıev OKQ-da ótken jatqan baspasóz máslıhatynda bólisti, dep habarlaıdy QazAqparat tilshisi.

Jalpy, 2020 jyly 11,5 myńǵa jýyq salyqtyq tekserý júrgizilgen. Bul kórsetkish aldyńǵy jylmen salystyrǵanda 58% nemese 16 myńǵa az. Dese de óndirip alý somasy 78 mlrd teńgeni quraǵan. 2020 jyly 2,9 myń kedendik tekserý júrgizilip, onyń nátıjesinde 30,6 mlrd teńge kóleminde qosymsha kedendik túsimder men salyqtar qosymsha eseptelip, 11,3 mlrd teńge óndirilgen.

«Jalpy, biz tekserýlerge dálirek shyǵa bastadyq. Ony jarııalanǵan statıstıka boıynsha baǵalaýǵa bolady. Qashyqtan basqarýdyń tıimdiligi 18% artyp, qosymsha 325 mlrd teńge usynyldy. Qashyqtan basqarýdyń jańa ádisteri ázirlendi. Táýekeldi kompanııalardy erte kezeńde anyqtaý jáne EShF (elektrondy shot-faktýra) berý qyzmetterin shekteý úshin pılottyq joba júzege asyrylýda», - dedi Marat Sultanǵazıev.

Ol pılottyq joba bastalǵannan beri 5 myń táýekeldi salyq tóleýshige EShF berý múmkindigi shektelgenin, onyń aınalymy 2 trln teńge, joba iske qosylǵannan beri barlyǵy 60 mlrd teńge bolǵanyn atap ótti.

«2016 jyldan bastap alǵash ret Qazaqstanda qolma-qol aqsha alý 38% qysqardy. Alaıda osy jyldyń 11 aıynda elden tys jerlerge aqsha aýdarymdarynyń kólemi kúrt ósti. Bul baǵyttaǵy ósim 19% qurap otyr. Biz osy qarajattardyń aýdarylýynyń oryndylyǵyn naqtylaýdy osy jyldyń basym mindeti retinde qoıdyq», - deıdi Marat Sultanǵazıev.