Qazaqstannan shetel azamattary asyrap alǵan balalardyń jalpy sany 8 805-ke jetti
ASTANA. QazAqparat - Qazaqstannan shetel azamattary asyrap alǵan balalardyń jalpy sany 8 805-ke jetti. Bul týraly «QazAqparattyń» resmı saýalyna QR BǴM Balalardyń quqyqtaryn qorǵaý komıteti joldaǵan jaýapta habarlandy.
«Al 2011 jyly shetel azamattarynyń bala asyrap alý rásiminiń mehanızmi qarastyrylatyn «Neke (erli-zaıyptylyq) jáne otbasy týraly» QR Kodeksi qabyldandy. Kodeks qabyldanǵannan keıin (sheteldik agenttikterdi akkredıtatsııalaý arqyly) elimizde barlyǵy 125 bala asyrap alyndy»,-dep atap ótilgen komıtet málimetinde.
«Neke (erli-zaıyptylyq) jáne otbasy týraly» Kodeks pen «Balalardy qorǵaý jáne balany sheteldikter asyrap alýǵa qatysty yntymaqtastyq týraly konventsııany ratıfıkatsııalaý týraly» QR Zańy qabyldanǵanǵa deıin respýblıkamyzda bala asyrap alý kúshi joıylǵan «Neke jáne otbasy» zańynyń talaptaryna sáıkes júzege asyrylatyn.
Qabyldanǵan Kodekstiń talaptaryna sáıkes qazaqstandyq azamattardyń bala asyrap alý protsedýrasynyń jeńildetilýimen birge qazaqstandyq balalardy asyrap alǵysy keletin sheteldikter úshin bala asyrap alý protsedýrasy kúsheıtildi.
Osy jyldyń sáýir aıynda qabyldanǵan «Qazaqstan Respýblıkasynyń keıbir zańnamalyq aktilerine balanyń quqyqtaryn qorǵaý máseleleri boıynsha ózgerister men tolyqtyrýlar engizý týraly» QR Zańymen bala asyrap alý jónindegi agenttikterge qoıylatyn talaptar kúsheıtildi.
Eger agenttik óziniń akkredıtatsııasynan aıyrylǵan jaǵdaıda quzyrly sheteldik memlekettik organdarǵa asyrap alynǵan balalar týraly esepti usyný mindetteri júkteledi, sondaı-aq asyrap alynǵan balalarǵa qatysty oryn alǵan barlyq qaıǵyly oqıǵalar, jaǵdaılar men zorlyq-zombylyq týraly dereý habarlaý qajettigi mindetteledi.
