Qazaqstannan shet elderge kólikpen kómir áketýge tyıym salynbaq

NUR-SULTAN. QazAqparat – Qazaqstannan shet memleketterge kóliktermen kómir áketýge tyıym salý josparlanyp otyr. Indýstrııa jáne ınfraqurylymdyq damý mınıstrliginiń osyndaı buıryǵy jarııalandy, dep habarlaıdy QazAqparat tilshisi.

Vedomstvo bıyl kommýnaldyq-turmystyq qajettilikterge paıdalanylatyn kómir baǵasynyń qymbattaýyna jol bermeý maqsatynda jospar ázirledi. Atalǵan josparǵa sáıkes, aǵymdaǵy jyly kómir tutyný kólemi shamamen 9,6 mln tonnana bolady dep boljanýda. Onyń ishinde, kommýnaldyq-turmystyq sektorǵa - 2,6 mln, al halyqqa satylatyny 7 mln tonnany quramaq.

«Byltyr qyrkúıekte aýa raıynyń kúrt salqyndaýyna baılanysty eldiń ortalyq jáne soltústik aımaqtarynda kómirge suranys artty. Osy jaǵdaıdy paıdalanǵan alypsatarlar bir tonnasyn 13 myń teńgeden satyp alyp, ony turǵyndarǵa 30 myń teńge satty. BAQ arqyly halyqtan ishki naryqqa arnalǵan kómir eksportqa shyǵarylyp jatyr degen ótinishter tústi. Taldaý kórsetkendeı, ótken jyly kórshi elderge kómir eksportynyń kólemi ulǵaıdy. Atap aıtqanda, Qyrǵyz Respýblıkasyna 19 paıyzǵa, Ózbekstan Respýblıkasyna 30 paıyzǵa eksport ósti. 2021 jyly Qyrǵyz Respýblıkasyna temirjol arqyly 1 020 tonna (2050 vagon), avtomobıldermen 123 myń tonna kómir tasymaldanǵan. Sondyqtan halyqty kómirmen qamtamasyz etýde kelispeýshilikter týyndamas úshin Indýstrııa jáne ınfraqurylymdyq damý mınıstrligi 2022 jylǵy 1 shildeden bastap 6 aıǵa kómirdi avtomobıldermen Qazaqstan terrıtorııasynan áketýge tyıym salý oryndy dep sanaıdy», - dep kórsetilgen buıryqta.

Quzyrly organ dereginshe, atalmysh bastama Syrtqy saýda saıasaty jáne halyqaralyq ekonomıkalyq uıymdarǵa qatysý máseleleri jónindegi vedomstvoaralyq komıssııanyń otyrysynda qoldaý tapqan.

Buıryq 10 tamyzǵa deıin ashyq talqylaýǵa shyǵaryldy.