Qazaqstannan Reseıge qosymsha tórt áýe baǵdary ashylady
ASTANA. QazAqparat - Reseılik «Ýralskıe avıalınıı» kompanııasy Qazaqstannan Reseıge deıin 4 áýe baǵdaryn ashýdy kózder otyr, dep habarlaıdy QazAqparat tilshisi QR IDM Azamattyq avıatsııa komıtetiniń Feısbýk paraqshasyna silteme jasap.
«2018-2019 jyldardaǵy kúzgi-qysqy navıgatsııa kezeńinde reseılik «Ýralskıe avıalınıı» kompanııasy Qazaqstan men Reseı arasyndaǵy 4 áýe baǵytyn ashyp, A319, A320, A321 áýe kemelerin ushyrýda josparlap otyr», - delingen komıtettiń habarlamasynda.
Atap aıtqanda, reseılik kompanııa Jýkovskıı-Almaty-Jýkovskıı (aptasyna 5 ret, 2018 jylǵy 24 jeltoqsannan bastap 2019 jylǵy 29 naýryzǵa deıin 1,2,3,4,5 kúni) baǵdary jáne Sankt-Peterbýrg-Almaty-Sankt-Peterbýrg (aptasyna 2 ret, 2018 jylǵy 24 jeltoqsannan bastap 2019 jylǵy 29 naýryzǵa deıin 1,5 kúni) baǵdary boıy ushaq shyǵarmaq.
Sonymen birge, kompanııa Jýkovskıı-Shymkent-Jýkovskıı áýe baǵdaryn 4-21 jeltoqsan aralyǵynda aptasyna 2 ret (3,5 kúni) jáne osy jyldyń 24 jeltoqsanynan 2019 jyldyń 24 naýryzyna aptasyna 5 ret (1, 3, 5, 6, 7 kúni) ushyrmaq. Tórtinshi baǵdar boıynsha taǵy bir ushaq Sankt-Peterbýrg-Shymkent-Sankt-Peterbýrg baǵytynda aptasyna bir ret (2018 jyldyń 23 jeltoqsanynan bastap 2019 jyldyń 24 naýryzyna deıin 7-shi kúni) ushyrylady.
«Birinshi baǵyt boıynsha «Ýralskıe avıalınıı» áýe kompanııasy ushýǵa ruqsat aldy. Qalǵan baǵyttar boıynsha úılestirý jumystary júrýde jáne keıbir kestege túzetýler engizilýi múmkin», - delingen habarlamada.
