Qazaqstannan Reseıge ınvestıtsııa kólemi 34 paıyzǵa artty

ASTANA. QazAqparat – Qazaqstannan Reseıge ınvestıtsııa kólemi 34 paıyzǵa artty. Bul týraly eki eldiń óńiraralyq yntymaqtastyq forýmynyń XVIII jalpy otyrysyna qatysýshylarǵa vıdeokonferentsııa rejıminde sóz arnaǵan Memleket basshysy Qasym-Jomart Toqaev aıtty, dep habarlaıdy QazAqparat tilshisi.

«Qazaqstanǵa reseılik eksport ta artyp kele jatyr. Munaı ónimderin jetkizý – 35, bolattan jartylaı fabrıkattar – 22, ken jáne baǵaly metaldar – 20 paıyzǵa artty, al astyq eksporty eselene tústi», - dedi Memleket basshysy.

Qazaqstan Prezıdentiniń dereginshe, elimizde reseılikterdiń qatysýy bar kompanııalar men qazaqstandyq-reseılik birlesken kásiporyndar tabysty jumys isteýde. Olardyń sany búginde 17 myńnan asyp túsedi.

«Qazaqstanǵa reseılik ınvestıtsııa kólemi jyl saıyn artyp keledi. Reseılik ınvestıtsııa qaýipsizdigin qamtamasyz etý jáne olardy ekonomıkamyzǵa barynsha tartý úshin qoldan kelgenniń bárin jasaımyz. Bul elderimiz arasynda tıimdi ekonomıkalyq ózara is-qımyl qalyptasqanynyń taǵy bir dáleli. Reseıden Qazaqstanǵa tikeleı ınvestıtsııa aǵyny ótken jyly pandemııaǵa deıingi deńgeıden úshten birge asyp túsip, 1,9 mlrd dollarǵa jetti. Buǵan qosa, Qazaqstannan Reseıge ınvestıtsııa kólemi de 34 paıyzǵa artyp, 535 mln dollarǵa jetti», - dedi Qasym-Jomart Toqaev.