Qazaqstannan Reseıge altyn rýdasyn asyrmaq bolǵan azamat quryqtaldy
ASTANA. QazAqparat - Qazaqstan-Reseı shekarasynda ornalasqan «Obaǵan-avto» baqylaý-ótkizý beketiniń shekara narıady osy jyldyń 20-sáýir kúni altyn quramdas tasty kontrabandalyq jolmen alyp ótpek bolǵan 49 jastaǵy Aleksandr esimdi Qazaqstan azamatyn ustady, dep habarlaıdy QR UQK ShQ baspasóz qyzmeti.
Atalǵan altyntas jerlesimizdiń «Leksýs 470» avtokóligin shekaralyq baqylaýdan ótkizý kezinde júksalǵyshynan tabyldy. Skotchpen oralǵan qundy tastyń salmaǵy 300 gramm bolyp shyqty. Aldyn ala tergeý kezinde ol zattyń 50 jastaǵy Vladıslav esimdi Reseı Federatsııasynyń azamatyna tıesili ekendigi anyqtaldy. Azamattyq is júrip jatýyna baılanysty Vladıslavtyń Qazaqstan aýmaǵynan shyǵýǵa bolmaıtyndyǵy anyqtaldy. Sol sebepti ol altyntasty dosynyń kómegimen shekara asyrmaq bolǵandyǵy málim boldy.
Atalǵan is boıynsha derekter Qostanaı oblysy Uzynkól aýdandyq ishki ister bólimine berildi.
