Qazaqstannan iri qara men usaq maldyń analyq basyn eksporttaýǵa alty aıǵa tyıym salyndy

ASTANA. KAZINFORM — Qazaqstanda iri qara men usaq maldyń analyq basyn shetelge shyǵarýǵa alty aıǵa tyıym salyndy. Aýyl sharýashylyǵy jáne qarjy mınıstrleri tıisti birlesken buıryqqa qol qoıdy. 

Qazaqstannan iri qara men usaq maldyń analyq basyn eksporttaýǵa alty aıǵa tyıym salyndy
Foto: AShM

— Qazaqstan aýmaǵynan, onyń ishinde Eýrazııalyq ekonomıkalyq odaqqa múshe memleketterge iri qara maldyń analyq basyn shyǵarýǵa alty aı merzimge tyıym salynsyn, — delingen qujatta.

Buıryqqa sáıkes, tyıym iri qara maldyń (EAEO SEQ TN kody — 0102) jáne usaq maldyń (0104) analyq basyna qatysty.

Aýyl sharýashylyǵy mınıstrligine bul shara týraly Eýrazııalyq ekonomıkalyq komıssııany habardar etý tapsyryldy.

Aýyl sharýashylyǵy mınıstrliginiń Veterınarııalyq baqylaý jáne qadaǵalaý komıteti Qarjy mınıstrliginiń Memlekettik kirister komıtetimen birlesip, buıryqtyń oryndalýyn qamtamasyz etý úshin qajetti sharalardy qabyldaýǵa tıis.

Buıryq 5 qarashadan bastap kúshine endi.

Eske sala keteıik, buǵan deıin Germanııadan Qazaqstanǵa quny 6 mlrd teńge bolatyn 5 myń asyl tuqymdy mal ákelinetini habarlanǵan edi.