Qazaqstannan Parıjge qalaı jetýge bolady

ASTANA. KAZINFORM – Qazir Frantsııa astanasy Parıj álem nazarynda. Búgin XXXIII jazǵy Olımpıadanyń alaýy tutanady. Búginde sport súıer qaýym Frantsııa astanasyna aǵylyp jatqan shyǵar. Osy oraıda elimizdiń Kólik mınıstrliginen Parıjge jetýdiń jolyn suraǵan edik.

«Qazaqstan men Frantsııa aralyǵynda qoldanystaǵy normatıvtik – quqyqtyq bazaǵa sáıkes ár taraptan aptasyna úsh ret turaqty reısti oryndaý ruqsat etilgen. Osylaısha, 2015 jyldan bastap «Air Astana» kompanııasy COVID-19 pandemııasy bastalǵanǵa deıin (2020 jyl) «Astana – Parıj» baǵyty boıynsha tikeleı áýe reısterin oryndady», - delingen mınıstrlik bergen jaýapta. 

Kólik mınıstrliginiń málimetinshe, qazir elimizden Parıjge tikeleı áýe reısi qatynamaıdy, biraq qazaqstandyqtar Eýropa qalalary arqyly jete alady. 

Atap aıtqanda, London (Ulybrıtanııa), Frankfýrt (Germanııa), Praga (Chehııa), Mılan (Italııa), Varshava (Polsha), Ystambul, Ankara (Túrkııa) arqyly jazǵy Olımpıada shaharyna ushyp barýǵa bolady. 

«Búginde 2 qazaqstandyq («Air Astana», «SCAT») jáne 5 sheteldik áýe kompanııasy («Lufthansa», «LOT Polish Airlines», «NEOS», «Turkish Airlines», «Pegasus Airlines») Eýropanyń 6 eline aptasyna 114 reıs jıiligimen 17 baǵyt boıynsha jolaýshylardy tasymaldaıdy», - deıdi vedomstvodan. 

Sondaı-aq, mınıstrlikten Qazaqstan Respýblıkasynda álemdik tájirıbege sáıkes áýe kóliginiń baǵasy memleket tarapynan rettelmeıtindigi habarlandy. 

Aıta keteıik, sanaýly saǵattan soń Parıj-2024 Olımpıadasy saltanatty túrde ashylady. 

Jibek Joly telearnasy elorda turǵyndary men qonaqtary úshin ortalyq saıabaqta Parıj Olımpıadasynyń ashylý saltanatyn tikeleı efırde, ashyq aspan astynda tamashalaýdy usynady.