Qazaqstannan Ózbekstannyń tarıhı qalalaryna ushatyn jańa reıster ashylady
ASTANA. QazAqparat - Astana jáne Almaty qalalary men Tashkent arasyndaǵy áýe reısteri kóbeıetin boldy. Bul týraly ulttyq áýe kompanııanyń resmı saıtyna silteme jasap birqatar ózbek BAQ-tary habarlaıdy.
Keshe, 18 qazanda «Ózbekstan áýe joldary» UAK-ta «Eır Astana» AQ áýekompanııasynyń basshylyǵymen kezdesý ótti. Onda taraptar Qazaqstan Respýblıkasy men Ózbekstan Respýblıkasy arasyndaǵy jolaýshy tasymalyn damytý, elderdiń týrıstik áleýettin arttyrýǵa sebi tıetin ózge de máselelerdi talqylady.
Kelissózderdiń qorytyndysyna oraı, Astana - Tashkent, Almaty - Tashkent baǵyttarynyń turaqty reısterin arttyrý týraly kelisimge qol jetkizildi, sondaı-aq Qazaqstan qalalarynan Ózbekstannyń Úrgenish, Buhara, Samarqant sekildi tarıhı qalalaryna jańa baǵyttar ashý máselesi talqylandy.
Budan tys, «Eır Astana» AQ áýe kemelerine «Uzbekistan airways technics» avıakásipornynyń bazasynda tehnıkalyq qyzmet kórsetý men jóndeý máseleleri de qaraldy.
Eske sala keteıik, búgingi tańda «Eır Astana» AQ jáne «Ózbekstan áýe joldary» UAK kompanııalary Almaty - Tashkent baǵytynda aptasyna 6, Astana - Tashkent baǵytynda aptasyna 2 reıs júzege asyrady.
