Qazaqstannan Ózbekstanǵa jerasty qubyrymen benzın tasymaldaǵandar ustaldy

TAShKENT. KAZINFORM – Qazaqstan men Ózbekstan shekarasynda jasyryn qubyr tartyp, sol arqyly janarmaı tasymaldaýmen aınalysqandar ustaldy, dep habarlaıdy Kazinform agenttiginiń menshikti tilshisi.

UzA aqparat agenttiginiń málimetinshe, eki ózbekstandyq Qazaqstan azamatymen sóz baılasa otyryp, AI-92 benzınin Túrkistan oblysynyń Saryaǵash aýdanynan Tashkenttiń Qybyraı aýdanyna tasymaldaǵan.

Zańsyz áreketti iske asyrý úshin olar 300 metrge jýyq jerasty qubyryn tartyp, sol arqyly Qazaqstannan Ózbekstanǵa janarmaı jiberip otyrǵan.

Anyqtalǵan fakti boıynsha qylmystyq is qozǵalyp, tergeý júrip jatyr.

Eske salaıyq, byltyr gaz ben elektr energııasyn zańsyz paıdalanǵan ózbekstandyqtar memleketke $108 mln shyǵyn keltirdi.

Sondaı-aq, jyl sońyna qaraı Ózbekstanda AI-80 markaly benzınin satýǵa shekteý qoıylmaq.