Qazaqstannan Ózbekstanǵa mefedron alyp ótpek bolǵan azamat ustaldy

TAShKENT. KAZINFORM — Reseıden ákelingen esirkini Qazaqstan aýmaǵy arqyly Ózbekstanǵa kirgizbek bolǵan azamat ustaldy, dep habarlaıdy Kazinform agenttiginiń menshikti tilshisi. 

Ózbekstan Memlekettik qaýipsizdik qyzmetiniń málimetinshe, qazaq-ózbek shekarasyndaǵy «Qaplanbek» — «Naýaı» keden beketinde kúdik týdyrǵan Lada Largus kóligine tekseris júrgizildi. Onyń barysynda temir tulparǵa tıelgen júkterdiń arasyna jasyrylǵan 2,3 keli mefedron anyqtaldy.

Ustalǵan 25 jastaǵy júgizýshiniń «Ózbekstan-Reseı» baǵytynda jolaýshy jáne júk tasymalymen aınalysqany belgili boldy. Tapsyrysqa saı, ol esirtkini Qashqadarııa oblysyndaǵy er adamǵa jetkizýi qajet. Tıisinshe, qaýipsizdik organdarynyń qyzmetkerleri mefedrondy qabyldap alýy tıis azamatty preparatty kútip alý barysynda qolǵa túsirdi.

Ustalǵan eki kúdiktige qatysty «Esirtkini zańsyz daıyndaý, satyp alý jáne saqtaý» baby boıynsha qylmystyq is qozǵalyp, olar qamaýǵa alyndy.

Eske salaıyq, byltyr qazaq-ózbek shekarasynda munaı ónimderin zańsyz ótkizýge arnalǵan týnnel anyqtalǵan bolatyn.

Qosa ketsek, buǵan deıin Ózbekstan Qaýipsizdik keńesi hatshysynyń orynbasary Bahodır Tashmatov Ortalyq Azııa arqyly jylyna 90 tonnaǵa jýyq geroın ótetini jaıly málimdep edi.

Munymen qatar, Qazaqstan arqyly 4 memleketke baǵyttalǵan aýǵan esirtkisiniń joly kesildi.