Qazaqstannan Ózbekstanǵa qatynaıtyn úsh jańa áýe baǵyty iske qosylady
ASTANA. KAZINFORM – Qazaqstan men Ózbekstan jańa avıamarshrýttar men Jibek joly boıynsha birlesken týrlar ashady. Premer-mınıstri Oljas Bektenovtiń tapsyrmasyn oryndaý aıasynda Qazaqstan men Ózbekstan arasyndaǵy týrızm jáne kólik baılanystaryn damytý jónindegi jumystar kúsheıtildi. Bul týraly Úkimettiń baspasóz qyzmeti habarlady.
Kólik mınıstrligi tarapynan úsh jańa áýe baǵyty iske qosylady. Osy jyldyń 1 jeltoqsanynan bastap SCAT áýekompanııasy Túrkistan – Buhara, Túrkistan – Úrgenish (Hıýa) jáne Túrkistan – Samarqand baǵyttary boıynsha turaqty ushady. Reıster ár baǵyt boıynsha aptasyna úsh ret oryndalady.
Bıletter satýǵa shyǵaryldy, ushý quny – bir baǵytqa 40 myń teńge. Bastapqy kezeńde áýe qatynastary turaqty jolaýshylar aǵynyn qalyptastyrý úshin sýbsıdııalanatyn bolady.
Marshrýttardyń ashylýy týrızmdi damytýǵa jáne Uly Jibek joly qalalaryn ilgeriletýge, sondaı-aq óńirlerdiń kólik baılanysyn kúsheıtýge jáne sheteldik týrıster aǵynyn yntalandyrýǵa baǵyttalǵan.
Sonymen qatar Týrızm jáne sport mınıstrligi Ortalyq Azııanyń Jibek joly boıynsha ortaq marshrýttyń jańa tujyrymdamasyn ázirledi. Oǵan aımaqtaǵy negizgi qalalar: Almaty, Shymkent, Túrkistan, Tashkent, Samarqand, Buhara jáne Hıýa kirdi, sondaı-aq ortaq tarıhı mura men tabıǵı resýrstar engizildi.
Samarqandqa alǵashqy týr kompastour operatorymen birlesip iske qosyldy. Qazir basqa týrıstik kompanııalarmen jańa týrlardy uıymdastyrý boıynsha kelissózder júrgizilip jatyr. 2026 jyly eki eldiń týrıstik resýrstaryn biriktirý maqsatynda Qazaqstan men Ózbekstannyń týrıstik áleýetin birlesip ilgeriletý josparlanyp otyr.
Aıta keteıik, Qazaqstan men Ózbekstan arasynda jol qysqartatyn jańa áýe baǵyty ashyldy.